စစ်ကောင်စီထောင်ထားတဲ့ မိုင်းနင်းမိလို့ အမျိုးသားတဦးသေဆုံး

စစ်ကိုင်းတိုင်း၊ ဝက်လက်မြို့နယ်အရှေ့ခြမ်း၊ စခန်းသာရွာသားတဦးဟာ စစ်ကောင်စီထောင်ထားတဲ့ မိုင်းကို နင်းမိပြီး သေဆုံးသွားတယ်လို့ Wetlet Informational Network ဆီက သိရပါတယ်။

စခန်းသာကျေးရွာက နေအိမ်တွေကို မီးရှို့ပြီး ရွာမှာ တညအိပ်သွားတဲ့ စစ်ကောင်စီစစ်ကြောင်းက ထောင်ထားခဲ့တဲ့ မိုင်းကို နင်းမိခဲ့တာဖြစ်တယ်လို့ သိရပါတယ်။

ရွှေဘိုကနေထွက်လာတဲ့ စစ်ကောင်စီစစ်ကြောင်းဟာ ဝက်လက်နယ် စခန်းသာရွာထဲကို စက်တင်ဘာ ၄ ရက် မနက်ပိုင်းမှာ ဝင်ရောက်လာပြီး ရွာမှာရှိတဲ့ နေအိမ် ၉၂ လုံးကို မီးရှို့ဖျက်ဆီးလိုက်ပါတယ်။ 

အဲ့ဒီနောက် ရွာမှာတညအိပ်စခန်းချခဲ့ပြီး နောက်နေ့မနက်မှာတော့ ရွာထဲမှာ နင်းမိုင်းတွေထောင်သွားပြီး ပြန်လည်ထွက်ခွာသွားခဲ့တယ်လို့ ဆိုပါတယ်။

အဲ့ဒီစစ်ကောင်စီစစ်ကြောင်း ကျေးရွာက ပြန်ထွက်သွားပြီးတဲ့နောက် ဒေသကာကွယ်ရေးတပ်ဖွဲ့တွေက နယ်မြေရှင်းလင်းရေးလုပ်နေချိန် စက်ကိရိယာတွေ မရှိတဲ့အတွက် နင်းမိုင်း ၃ လုံးကိုသာ တွေ့ရှိခဲ့ပါတယ်။ 

ကျေးရွာထဲကို ရွာသားတွေ ပြန်ရောက်ပြီး စက်တင်ဘာ ၈ ရက်မှာ လူငယ်တချို့ ခြင်းလုံးခတ်နေတဲ့နေရာက နောက်ထပ် မြေမြှုပ်မိုင်း ၂ လုံးပေါက်ကွဲလို့ အသက် (၂၀)အရွယ်အမျိုးသားတဦး ပွဲချင်းပြီးသေဆုံးသွားတယ်လို့ Wetlet Informational Network အဖွဲ့တာဝန်ခံတဦးက ပြောပါတယ်။

“အခုဆို ရွာသားတွေဟာ မြေပြင်ကိုတောင် ခြေမချရဲကြတော့ဘူး။ အခုထောင်ထားတဲ့ နင်းမိုင်းကလည်း သူတို့ လက်လုပ်ဆင်ထားတဲ့နင်းမိုင်း တော်တော်ကြီးတာ။ ကလေးက ထိထိချင်း ခြေတဖက်ပြတ်သွားတယ်။ အူတွေပါ ထွက်ကုန်တာ” လို့ သူက ဆိုပါတယ်။

မိုင်းမိပြီးပွဲချင်းပြီးသေဆုံးသွားတဲ့ အဲ့ဒီအမျိုးသားကို စက်တင်ဘာ ၈ ရက် ညနေ ၅ နာရီကျော်လောက်မှာ သင်္ဂြိုဟ်ပေးလိုက်ပြီဖြစ်တယ်လို့လည်း သိရပါတယ်။ 

ဒါ့အပြင် စစ်ကောင်စီ မီးရှို့သွားတဲ့ နေအိမ်က ပြည်သူတွေဟာ တောတွေထဲမှာ မိုးကာမိုးပြီး နေနေကြသလို တချို့ကလည်း ဆွေမျိုးတွေရှိရာ နေရာမှာ သွားရောက်နေထိုင်ကြတယ်လို့လည်း သိရပါတယ်။ 

စာတည်း - လင်းဇေ

#မြေလတ်အသံ

#စစ်ကိုင်းတိုင်း #ဝက်လက်မြို့နယ် #စခန်းသာရွာ #စစ်ကောင်စီ #ဒေသခံ #မိုင်းနင်းမိ #လက်လုပ်မိုင်း #သတင်း