စစ်ကြောင်းထိုးလာတဲ့ စစ်တပ်က ဆိပ်ဖြူနယ်၊ ကျစ်ပြင်ရွာက နေအိမ်တလုံးကို မီးရှို့
မကွေးတိုင်း၊ ဆိပ်ဖြူမြို့နယ်၊ ကျစ်ပြင်ရွာကို စစ်ကောင်စီတပ်က စစ်ကြောင်းထိုးဝင်ရောက်လာပြီး နေအိမ်တလုံးကိုလည်း မီးရှို့သွားတယ်လို့ ဒေသခံတွေဆီက သိရပါတယ်။
ဧပြီလ ၄ ရက် ဒီမနက် ၁၀ နာရီလောက်မှာ အင်အား ၄၀ ကျော်ရှိတဲ့ စစ်ကောင်စီစစ်ကြောင်းက ပုသိမ် − မုံရွာလမ်းဘေးရှိ ကျစ်ပြင်ရွာထဲက နေအိမ်ကို မီးရှို့ခဲ့ပြီးနေ့လယ် ၁၂ နာရီကျော်လောက်မှာ ရွာကနေပြန်ထွက်ခသွားတယ်လို့ ဆိပ်ဖြူမြို့ခံတဦးက ပြောပါတယ်။
![](https://myaelattathan.org/storage/editor_images/April2023/72fc1676ec.jpeg)
![](https://myaelattathan.org/storage/editor_images/April2023/1397d4a4a4.jpeg)
“စခတွေ ရွာထဲဝင်လာတာကို ရွာသားတယောက်ကတွေ့ပြီး၊ ရွာထဲကိုအချိန်မှီပြောနိုင်လို့ ရွာသားတွေကလွတ်သွားတယ်။မဟုတ်ရင် ရွာသားတွေလည်းအဖမ်းခံရနိုင်တယ်။ ဒီတခါဝင်လာတာက လက်နက်တွေပစ်ဖောက်တာမျိုးမဟုတ်ဘူး။ ဒီအတိုင်းအသံမပေးပဲ ဝင်လာတာ၊ ရွာထဲကအိမ်တအိမ်ကိုလည်း မီးရှို့သွားတယ်”လို့ ဆိုပါတယ်။
အဲ့ဒီစစ်အုပ်စုဟာ ရွာထဲက အခြားနေအိမ်တွေကိုလည်း ဝင်ရောက်မွှေနှောက်သွားခဲ့ပြီး၊ လက်ရှိမှာ ရွာသားအချို့ကတော့ ရွာထဲကို ပြန်၀င်နေကြပြီလို့လည်း ဆိုပါတယ်။
![](https://myaelattathan.org/storage/editor_images/April2023/3a07abc18d.jpeg)
အိမ်ခြေ ၁၀၀ နီးပါးရှိတဲ့ ကျစ်ပြင်ရွာဟာ ခုလိုမီးရှို့ခံရတာ ပထမအကြိမ်ဖြစ်တယ်လို့လည်း ဆိုပါတယ်။
အခုနှစ် ဖေဖော်ဝါရီ ၂၁ ရက်ကလည်း ဆိပ်ဖြူမြို့နယ်က ကျေးရွာတွေထဲကို စစ်ကောင်စီတပ်ဖွဲ့တွေက ဝင်ရောက်လာခဲ့လို့ ကျစ်ပြင်၊ ရွာသာကုန်း၊ သက္ကယ်ကျင် နဲ့ ထွန်ရွာတို့က ဒေသခံပြည်သူ ၁၀၀၀ ကျော်ဟာ ဘေးလွတ်ရာကိုထွက်ပြေးတိမ်းရှောင်ခဲ့ရပါသေးတယ်။
စာတည်း - လင်း
#မြေလတ်အသံ
Share
Share
Share