စစ်တောင်းမြစ်ဘေးက အိမ်တချို့ ရေနောက်မျောပါ၊ ကူညီသူတွေရောက်မလာသေး

ပဲခူးတိုင်းအရှေ့ခြမ်း၊ ရေတာရှည်မြို့နယ်၊ ရွှေကစောင်းရွာအရှေ့ပိုင်းဟာ စစ်တောင်းမြစ်ရေတက်လို့ စက်တင်ဘာ ၁၃ ရက် ဒီမနက်မှာ အနည်းဆုံး နေအိမ် ၃လုံး ရေနောက်မျောပါသွားပြီး ကူညီကယ်ဆယ်သူတွေရောက်ရှိမလာသေးဘူးလို့ ဒေသခံတဦးဆီက သိရပါတယ်။

ရွှေကစောင်းရွာအရှေ့ပိုင်းဟာ စစ်တောင်းမြစ်နဲ့  စစ်တောင်းမြစ်ကိုကာထားတဲ့ ရွှေကစောင်းတမံကြားမှာတည်ရှိနေတာလို့ ဆိုပါတယ်။

“အခုပဲ ကျ‌နော့ဦးလေးအိမ် ရေထဲလိမ့်ပါသွားတယ်။ တမံအဆင်း မြစ်ကမ်းဘေးကလေ။ လက်ရှိအချိန်အထိတော့ ရေကမတိုးဘဲ တန့်နေတယ် “လို့ ဒေသခံတဦးက ပြောပါတယ်။ 

စစ်တောင်းမြစ်ကမ်းဘေးတလျှောက်ရှိ ဆွာဝပေါက်၊ သရက်တော၊ ကူးတို့ဆိပ်၊ ဆွာသောင်ကမ်း၊ ဆွာသောင်ကြီးရွာ စတဲ့ကျေးရွာတွေဟာလည်း ရေဝင်ရောက်မှုဒဏ်ကို ခံနေရတယ်လို့ သူကဆက်ပြောပါတယ်။

ရွှေကစောင်းရွာအရှေ့ခြမ်းက အမျိုးသမီးတဦးကလည်း “လူတွေက အိမ်ပေါ်ကအောက်ကို မဆင်းတတ်တာ။ ကျမတို့ သူများအိမ်သွားနေရတာ။ မိန်းကလေးတွေပဲမို့ ယောက်ျားသားရှိတဲ့အိမ် စုနေရတာ။ ရေတိုးကအရမ်းပဲမြန်တာ။ အိမ်သုံးလုံးလောက် ရေနောက်မျောတယ်လို့ ဖုန်းအဆက်အသွယ်နဲ့ သိရတာ ဘယ်မှမသွားရဲဘူး၊ ကယ်ဆယ်ရေးက မရောက်သေးဘူး။ လာမယ်လို့တော့ ပြောတာပဲ။”လို့ ပြောပါတယ်။

လက်ရှိမှာနေအိမ်ပေါ်ကို ခပ်တင်ထားတဲ့ရေကို ‌သောက်သုံးနေရပြီး အခြားအိမ်တွေကထင်းတွေနဲ့ ချက်ပြုတ်စားသောက်နေရကာ တရက် နှစ်ရက်သာ တောင့်ခံနိုင်ပြီး နေအိမ်အချို့မှာ လက်ရှိအချိန်ထိ စားသောက်ဖို့ အဆင်မပြေကြဘဲ ‌ကျေးရွာသားတချို့ ပြောင်းရွှေ့တာတွေရှိသလို ကျေးရွာအတွင်းမှာ ဆက်လက်နေထိုင်နေသူတွေလည်း ရှိနေတယ်လို့ သူက ဆက်ပြောပါတယ်။

ရွှေကစောင်းရွာအရှေ့ပိုင်းကို လွန်ခဲ့တဲ့ သုံးရက်ကစကာ မြစ်ရေစတင်ဝင်‌‌ရောက်တာဖြစ်ပြီး အိမ်ထောင်စု ၁၃၀ ကျော်ရှိကာ လူဦးရေ ၆၀၀ ဝန်းကျင်ခန့်ရှိတယ်လို့ ဆိုပါတယ်။

လက်ရှိမှာ စစ်တောင်းမြစ်ကို ကာထားတဲ့အမြင့် ၁၀ ပေခန့်ရှိတဲ့ တမံကိုလည်းမြစ်ရေကျော်နေတဲ့အတွက် ရွှေကစောင်းရွာရဲ့ အလယ်ပိုင်းနဲ့ အနောက်ပိုင်းကိုလည်း မြစ်ရေတွေ ဝင်ရောက်နေတယ်လို့ ပြောပါတယ်။

အလားတူ ဒီနေ့မနက်ပိုင်းမှာလည်း စစ်တောင်းမြစ်ရေတက်တဲ့အတွက် တောင်ငူမြို့နယ်အတွင်းက ကျေးရွာတွေမှာလည်း ရေကြီးရေလျှံမှုတွေဖြစ်ပေါ်နေတယ်လို့ သိရပါတယ်။

ပုံစာ - ရေနောက်မျောသွားတဲ့ နေအိမ်၊ ရွှေကစောင်းတမံနှင့် ရွှေက‌စောင်းရွာအနောက်ပိုင်းက ဘုန်းတော်ကြီးကျောင်း။ 

စာတည်း - ဈာန်မြင့်

#မြေလတ်အသံ

#ပဲခူး #ရေတာရှည် #ရွှေကစောင်းရွာ #ရေနစ်မြုပ် #သဘာဝဘေးအန္တရာယ်