ကျည်လွဲအဆောင်ရှိတယ်ဆိုပြီးနာမည်ကြီးတဲ့ သေနတ်ကိုင် စစ်မှုထမ်းဟောင်းအုပ်ချုပ်‌ရေးမှူး သေနတ် ၁၂ ချက် ပစ်သတ်ခံရ

ပဲခူးတိုင်းအနောက်ခြမ်း၊ မင်းလှမြို့နယ်မှာ သေနတ်ကိုင်ဆောင်ထားတဲ့ စစ်ကောင်စီလက်အောက်အုပ်ချုပ်ရေးမှူးတဦးကို ပစ်သတ်ကာ သေနတ်နဲ့ ကျည်ဆန်အပါ အခြားပစ္စည်းတွေကိုလည်း သိမ်းဆည်းခဲ့တယ်လို့ သာယာဝတီခရိုင်တပ်ရင်း ၃၈၀၂၊ တပ်ခွဲ ၄၊ အုတ်ဖိုမြေအောက်ပြောက်ကျားတပ်ဖွဲ့ တာဝန်ရှိသူဆီက သိရပါတယ်။

သေဆုံးသူမှာ မင်းလှမြို့နယ်၊ ဘွတ်စိန်ပုအုပ်စု အုပ်ချုပ်ရေးမှူး ကိုညွန့်မြိုင်ဖြစ်ပြီး ဩဂုတ် ၅ ရက် ဒီမနက် ၉ နာရီကျော်လောက်က ဘွတ်စိန်ပုအုပ်စု တံတားအနီးမှာ ဆိုင်ကယ်စီးလာချိန် သေနတ်နဲ့ ၁၂ ချက်ပစ်သတ်ခဲ့တာလို့ ဆိုပါတယ်။

“သူက ခလရ ၁ ကနေ တယောက်တည်း ဘွတ်စိန်ပုရွာကိုပြန်လာတာကို စောင့်ပြီးပစ်ခတ်ခဲ့တာ။ ခေါင်းကို ၅ ချက်၊ ရင်ဘတ်ကို ၇ ချက် ပစ်ခတ်ခဲ့လို့  ပွဲချင်းပြီးသေသွားတာ။ သူက ကျည်လွဲအဆောင်ရှိတယ်ဆိုပြီး နာမည်ကြီးနေတာလေ။“လို့ မြေအောက်ပြောက်ကျားတပ်ဖွဲ့  တပ်ခွဲမှူးရဲဘော်ဒေဝက မြေလတ်အသံကို ပြောပါတယ်။

ပစ်ခတ်မှုဖြစ်တဲ့ နေရာဟာ စိန်ကန့်လန်အခြေစိုက် ခလရ ၁ နဲ့ နီးကပ်တာကြောင့် ပစ်ခတ်မှုအပြီး ၅ မိနစ်ခန့်အကြာမှာ စစ်သား ၂၀ ဦးလောက် သေနတ်တွေပစ်ဖောက် ရောက်ရှိလာပြီး အလောင်းကို လာသယ်သွားတယ်လို့ သူကဆက်ပြောပါတယ်။

သေဆုံးသွားတဲ့အုပ်ချုပ်ရေးမှူးဆီကနေ လက်လုပ်သေနတ် ၁ လက်၊ ကျည် ၁၆ တောင့်၊ လက်ပစ်ဗုံး ၂ လုံး၊ ကျည်ကာ ၁ ထည်၊ ဆိုင်ကယ် ၁ စီး၊ လက်ကိုင်ဖုန်း ၁ လုံး၊ ငွေကျပ် ၁၂၅,၀၀၀ ကျပ်နဲ့ စစ်မှုထမ်းဟောင်းပင်စင်အသိအမှတ်ပြုကတ်ပြားတို့ကို သိမ်းယူခဲ့တယ်လို့ ဆိုပါတယ်။

ကိုညွန့်မြိုင်ဟာ တာဝန်မှ အနားယူထားကြောင်း သတင်းလွှင့်ထားပေမယ့် စစ်ကောင်စီအတွက် ဆက်လက်အလုပ်လုပ်ကာ စစ်မှုထမ်းကြေးဆိုကာ ပြည်သူတွေဆီက တအိမ်ထောင်ကို ကျပ်သုံးသောင်းခွဲကောက်ခံနေပြီး မပေးပါက စစ်တပ်ခေါ်ဖမ်းခိုင်းမည်ဆိုကာ ကျေးရွာနေပြည်သူတွေကို ခြိမ်းခြောက်နေသူလို့ ထုတ်ပြန်ချက်မှာ ဖော်ပြထားပါတယ်။

ကိုညွန့်မြိုင်ဟာ ပြီးခဲ့တဲ့နှစ်နိုဝင်ဘာ ၉ ရက်ကလည်း အခုတိုက်ခိုက်ခံရတဲ့နေရာအနီးမှာ အုတ်ဖိုမြေအောက်ပြောက်ကျားတပ်ဖွဲ့ရဲ့ သေနတ်နဲ့ပစ်ခတ်သတိပေးခံခဲ့ရသူလည်း ဖြစ်ပါတယ်။

ပြီးခဲ့တဲ့ ဇူလိုင် ၈ ရက်ကလည်း အုတ်ဖို မြေအောက်ပြောက်ကျားတပ်ဖွဲ့ဟာ အုပ်ဖိုမြို့နယ်၊ ချောင်းခွ(ဂျီ)အုပ်စု အုပ်ချုပ်ရေးမှူး ကိုချစ်ကို ကိုလည်း သေနတ်နဲ့ ပစ်သတ်ခဲ့ပါသေးတယ်။

ပုံစာ - ကိုညွန့်မြိုင်အလောင်းနှင့် သိမ်းဆည်းခဲ့သည့် ပစ္စည်းများ။

စာတည်း - ဟိန်းစံ

#မြေလတ်အသံ

#ပဲခူး #မင်းလှ #အုပ်ချုပ်ရေးမှူး #ပစ်ခတ်ရှင်းလင်း #အုတ်ဖိုမြေအောက်ပြောက်ကျားတပ်ဖွဲ့