စစ်ရှောင်စခန်းမှာမွေးတဲ့ ကလေးကို ‌ပစ်‌တိုင်းထောင်လေးများအဖွဲ့က အလှူငွေနဲ့ကလေးပစ္စည်းများ လှူဒါန်း

စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးကျေးရွာအုပ်စု စစ်ရှောင်စခန်းမှာမွေးတဲ့ ကလေးငယ်ကို အညာပစ်တိုင်းထောင်လေးများအဖွဲ့က ဇွန်လ ၂၁ ရက် ဒီနေ့မှာ သွားရောက်လှူဒါန်းခဲ့တယ်လို့ အဖွဲ့ တာဝန်ခံတွေဆီက သိရပါတယ်။

ကလေးကို ဆားလင်းကြီးစစ်ရှောင်စခန်းမှာ ဇွန်လ ၁၆ ရက် မနက် ၁ နာရီလောက်က ဒေသခံစစ်ရှောင် တွေကပဲ မွေးဖွားပေးခဲ့တာဖြစ်ပြီး ကလေးနဲ့မိခင်အတွက် အလှူငွေ တသိန်းကျပ်နဲ့ အသုံးအဆောင်ပစ္စည်းတချို့ကို လှူဒါန်းခဲ့တယ်လို့ အညာပစ်တိုင်းထောင်လေးများအဖွဲ့က ဆိုပါတယ်။

"ကလေးအတွက် ၅သောင်း နဲ့ အမေအတွက် ၅သာင်းလှူပေးခဲ့တယ်။ ကလေးကယောက်ျားလေးပါ။ ဒီ စစ်ရှောင်စခန်းမှာမွေးတာ ကလေး ၃ယောက်ရှိပါပြီ။ ၃ ယောက်စလုံးကလည်း ယောက်ျားလေးတွေပါပဲ" လို့  အဖွဲ့ဝင်တဦးက မြေလတ်အသံကိုပြောပါတယ်။

အညာပစ်တိုင်းထောင်လေးများအနေနဲ့  ညောင်ပင်ကြီးအုပ်စုစစ်ဘေးရှောင်စခန်းက ကလေးငယ်ကို ထပ်မံလှူဒါန်းဖို့ စီစဉ်ထားပြီး အဲဒီစစ်ရှောင်စခန်းက ဒေသခံတွေရဲ့ကျန်းမာရေးစောင့်ရှောက်မှုတွေကိုလည်း ကာကွယ်ရေးအဖွဲ့အစည်းတွေက ဆေးဝါးကုသမှုတွေလုပ်ဆောင်ပေးတယ်လို့လည်း သိရပါတယ်။

ပြီးခဲ့တဲ့ ဇွန်လ ၉ ရက်က စစ်ကောင်စီလက်အောက်ညောင်ပင်ကြီးရွာနယ်မြေရဲစခန်း တိုက်ခိုက်သိမ်းပိုက်ခံရပြီးတဲ့နောက် စစ်ကောင်စီတပ်တွေက ညောင်ပင်ကြီးရွာအပါအဝင် ကျေးရွာအုပ်စုအတွင်းကရွာတွေကို စစ်ကြောင်းထိုးတာ၊ လူနေအိမ်တွေကိုမီးရှို့တာတွေကို ဆက်တိုက်လုပ်ဆောင်နေတာကြောင့် ဒေသခံတွေအနေနဲ့ အခုလိုထွက်ပြေးနေရတာပါ။

ဇွန်လ ၁၇ ရက်ကလည်း အညာပစ်တိုင်းထောင်လေးများအဖွဲ့ဟာ ဆားလင်းကြီးမြို့နယ်ထဲက စစ်ရှောင်ပြည်သူ အိမ်ထောင်စု ၇၀ အတွက် တစ်အိမ်ထောင်လျှင် ဆန် ၂ ပြည်၊ ဆီ ၅၀ သား၊ ငါးသေတ္တာ ၁ ဘူးနှုန်း လှူဒါန်းခဲ့ပါသေးတယ်။

စာတည်း - ရင်ငြိမ်း

#မြေလတ်အသံ

#စစ်ကိုင်း #ဆားလင်းကြီး #စစ်ဘေးရှောင်  #လှူဒါန်းမှု #အညာပစ်တိုင်းထောင် #ကလေးငယ်