စစ်ရှောင်တွေ အဓိကအသုံးပြုနေတဲ့ တံတားတစင်း ရေစီးကြောင့် မျောပါပျက်စီး

“ခင်ဦးနယ်အနောက်ခြမ်းကို စစ်ကြောင်းထိုးရင် အခုတံတားကိုအသုံးပြုပြီး ရေဦးမြို့နယ်ဘက်ကို စစ်ရှောင်ရတယ်။ ရေဦးနယ်ဘက်ကို စစ်ကြောင်းထိုးလာရင် အဲဒီတံတားကနေ ခင်ဦးနယ်ဘက်ခြမ်းကို ရှောင်လာတယ်။ အခုတံတားက ရေထဲကို ဗေဒါပုံတွေ၊ ဒိုက်ပုံတွေနဲ့တိုက်ပြီး ရေစီးကြောင်း အားကောင်းလို့ တံတားအလယ်ကနေ ကျိုးပြီးမျောပါသွားတယ်”လို့ KDK – Khin U Dog Killers မှ တာဝန်ရှိသူတဦးက ပြောပါတယ်။

အဲ့ဒီတံတားကိုအားထားပြီး ထွက်ပြေးတိမ်းရှောင်နေရတဲ့ ခင်ဦး နဲ့ ရေဦးမြို့နယ်ထဲက ကျေးရွာတွေအပါအဝင် ရွာပေါင်း ၂၀ က ဒေသခံတွေဟာ အခုချိန်မှာ စစ်တပ်က စစ်ကြောင်းထိုးလာမှာကို စိုးရိမ်နေကြပါတယ်။
အဲ့ဒီ ယာယီစစ်ရှောင်တံတားကို ဆောက်လုပ်ထားတာဟာ တနှစ်ကျော်လောက် ရှိပြီး၊ အဲဒီတံတားကို စစ်ကောင်စီတပ်ဖွဲ့တွေက ၂၀၂၂ ခုနှစ်မှာ တကြိမ်၊ ၂၀၂၃ ခုနှစ် ဇန်နဝါရီလ ၂၈ ရက်မှာတကြိမ် စုစုပေါင်း ၂ ကြိမ်တိတိ မီးရှို့ဖျက်စီးတာတွေလည်း လုပ်ခဲ့သေးတယ်လို့ သိရပါတယ်။

“အဲဒီတံတားက အရင်စစ်ကြောင်းတွေတုန်းက စစ်ရှောင်ပြည်သူတွေ အခက်အခဲဖြစ်အောင် (စစ်တပ်က) ဖျက်ဆီးခဲ့တာတွေရှိတယ်။ သူတို့ဖျက်စီးသွားတာတွေကို ကာကွယ်ရေးတပ်ဖွဲ့တွေက ယာယီပြန်ပြီး ဆောက်လုပ်ပေးထားတာပါ။ အဲဒီတံတားက ဝါးတွေ၊ ကပ်တွေနဲ့ ဆောက်လုပ် ထားတာပါ” လို့ People’s Defence Comrade မှ ပြန်ကြားရေးတာဝန်ခံ ထူးခန့်ဇော် (အမေ့သား)က ပြောပါတယ်။

လက်ရှိမှာတော့ အဲ့ဒီတံတားကို ကာကွယ်ရေးတပ်အချို့နဲ့ ဒေသခံတွေစုပေါင်းပြီး ရေထဲမျောပါသွားတဲ့ တံတားအပိုင်းအစတွေကို ပြန်လည်ဆည်ယူပြီး တံတားကို ပြန်လည်ပြုပြင်နေတယ်လို့လည်း သိရပါတယ်။

စာတည်း - လင်း
#မြေလတ်အသံ
#စစ်ကိုင်း #ခင်ဦး #ရေဦး #စစ်ရှောင် #တံတားပျက်ဆီး