စစ်အုပ်စုရဲ့ပစ်ခတ်မှုကြောင့် မုံရွာ ဒေသခံ ၂ ဦး ကျည်ထိမှန်သေဆုံး၊ ၄ ဦးဒဏ်ရာရ

စစ်ကိုင်းတိုင်း၊ မုံရွာမြို့နယ်၊ တောပုရွာမှာတပ်စွဲနေတဲ့ စစ်သားနဲ့ပျူစောထီးတွေက လက်နက်ကြီးနဲ့ ပစ်ခတ်ရာ ရွာချင်းကပ် ကြာပိုင်ကျေးရွာကို ကျရောက်ခဲ့တာကြောင့် ရွာခံအမျိုသား ၁ ဦးနဲ့ အမျိုးသမီး ၁ ဦး ထိမှန်သေဆုံးခဲ့တယ်လို့ မုံရွာ - အမြင့်လမ်း သတင်းမှန်ပြန်ကြားရေးဆီက သိရပါတယ်။ 

အဲ့ဒီစစ်ကောင်စီအဖွဲ့ဟာ သြဂုတ် ၁၃ ရက် မနေ့ ညနေ ၆ နာရီလောက်မှာ ၆၀ မမ နဲ့ ၃ ကြိမ်ပစ်ခတ်ခဲ့တာကြောင့် ကြာပိုင်ကျေးရွာက အသက် ၄၀ အရွယ် အမျိုးသားနဲ့ ၃၂ နှစ်အရွယ် အမျိုးသမီးတဦးသေဆုံးခဲ့ပြီး နောက်ထပ် အမျိုးသား ၂ ဦးနဲ့ အမျိုးသမီး ၂ ဦးလည်း ဒဏ်ရာရခဲ့တယ်လို့ ဆိုပါတယ်။ 

“လက်နက်ကြီးနဲ့  သုံးလုံးပစ်တယ်။ ရွာအရှေ့မှာ ၂ လုံးကျတယ်။ ရွာထဲမှာ ၁ လုံးကျတယ်။ လက်နက်ကြီးကြောင့် သေသွားတဲ့သူတွေကို မနေ့ညကတည်းက သင်္ဂြိုဟ်ပေးလိုက်တယ်။”လို့ မုံရွာ - အမြင့်လမ်း သတင်းမှန်ပြန်ကြားရေး အဖွဲ့ဝင်က ပြောပါတယ်။ 

ကြာပိုင်ကျေးရွာအနီးမှာ မနေ့က ဒေသခံကာကွယ်ရေးတပ်တွေနဲ့ တောပုရွာမှ ပျူစောထီးတွေ ထိတွေ့မှုဖြစ်ခဲ့ပြီးနောက်မှာ ခုလိုပစ်ခတ်ခဲ့တာလို့ သိရပါတယ်။ 

ဒါ့အပြင် ဒီပစ်ခတ်မှုကြောင့် လူနေအိမ် ၂ လုံးလည်း ထိမှန်ပျက်စီးပြီး နွား ၂ ကောင်လည်း သေခဲ့ကာ ရွာသားတွေကတော့ တိမ်းရှောင်ခဲ့တာ မရှိခဲ့ဘူးလို့ ဆိုပါတယ်။ 

ပြီးခဲ့တဲ့ ဇူလိုင် ၂၉ ရက်ကလည်း မုံရွာမြို့အဝင်ရှိ စစ်ကောင်စီစစ်ဆေရေးဂိတ်ကနေ လက်နက်ကြီး ၆ လုံးနဲ့ မအူကျေးရွာထဲကို ပစ်ခတ်ခဲ့လို့ အဲဒီကျေးရွာက ပြည်သူ ၄ ဦး ထိမှန်ဒဏ်ရာရရှိခဲ့ပါသေးတယ်။

စာတည်း - လင်း 

#မြေလတ်အသံ 

#စစ်ကိုင်း #မုံရွာ #စစ်ကောင်စီ #လက်နက်ကြီးပစ်ခတ် #၂ဦးသေဆုံး #သတင်း