ဆင်ဖြူကျွန်းမှာ မုန်တိုင်းကြောင့်သေဆုံးသူ ၄ ဦးအထိ ရှိလာ

"အလောင်းက နေပူလိုက် မိုးရွာလိုက်နဲ့ ရက်ကလည်းကြာတော့ သယ်ဖို့ကလည်း ခက်ခဲလို့ တွေ့တဲ့နေရာမှာပဲသေချာမီးသဂြိုဟ်ပြီး ပြာကိုရေမျောပေးခဲ့ပါတယ်။ ကိုကျော်လင်းရွှေအပါအဝင် မုန်တိုင်းကြောင့် ဆင်ဖြူကျွန်းမှာရေမျောသေဆုံးတာ ၄ ဦးရှိပြီ" လို့ မြို့ခံတဦးက ပြောပါတယ်။

ကိုကျော်လင်းရွှေဟာ မေလ ၁၄ ရက်ညနေက ရေကြီးနေခိုက် မြောက်ရှားတောရွာမှာ မြက်ရိတ်နေရင်း ရေစီးထဲမျောပါပျောက်ဆုံးခဲ့တာလို့ သူကဆက်ပြောပါတယ်။

အလားတူ ဆင်ဖြူကျွန်းမြို့က အသက် ၇၀ နှစ်အရွယ် ဒေါ်အေးသန်း၊ သမီးဖြစ်သူ အသက် ၄၄ နှစ်အရွယ် မယဥ်မင်းစိုးနဲ့ နွယ်တမယ်ရွာသား အသက် ၂၂ နှစ်အရွယ် ကိုရှိန်းတို့လည်း အဲဒီ (မေလ ၁၄ ရက်) ညနေကပဲ ရေနောက်မျောပါသေဆုံးခဲ့ရာ မေလ ၁၅ ရက်မှ နေရာအသီးသီးကနေတွေ့ရှိပြီး သင်္ဂြိုဟ်ပြီးစီးခဲ့တာလို့ သိရပါတယ်။

ဒါ့အပြင် စလင်းမြို့ခံတဦးရဲ့ လူမူကွန်ယက်စာမျက်နှာမှာလည်း မိုခါမုန်တိုင်းကြောင့် စလင်းမြို့နယ်၊ ငါးသန်ခေါင်းအုပ်စု၊ ဂွေးကုန်းရွာက ကိုသာဓုနဲ့ကိုမျိုးအောင်တို့ညီအကို ၂ ဦးအပြင် ထနောင်းကုန်းရွာက အသက် ၄၅ နှစ်အရွယ် ဦးကြည်ဝင်း (လက်ရှိမြင်တင်ရပ်ကွက်နေထိုင်သူ) တို့လည်း ရေနောက်မျောပါ ပျောက်ဆုံးခဲ့ပြီး ကိုမျိုးအောင်ရဲ့အလောင်းကိုတော့ သင်္ဂြိုဟ်ပြီးစီးခဲ့တယ်လို့ ဖော်ပြထားခဲ့ပါသေးတယ်။

ပုံစာ - ရေနောက်မျောပါ သေဆုံးခဲ့သည့် စွန်းကျွန်းညိုကျေးရွာမှ အသက် ၃၄ နှစ်အရွယ် ကိုကျော်လင်းရွှေ။

စာတည်း - လင်း

#မြေလတ်အသံ
#စစ်ကိုင်း #ဆင်ဖြူကျွန်း #စလင်း #မိုခါမုန်တိုင်း #ရေနစ်သေဆုံး