ဆားလင်းကြီးက ရဲစခန်းနဲ့ ထွေအုပ်ရုံး တိုက်ခိုက်ခံရပြီးနောက် စစ်တပ်က အိမ်တွေကိုမီးရှို့ (ရုပ်/သံ)

စစ်ကိုင်းတိုင်း၊ ဆားလင်းကြီးမြို့ပေါ်က မြို့မရဲစခန်းနဲ့ ထွေအုပ်ရုံးမှာ အထိုင်ချတပ်စွဲထားတဲ့ စစ်ကောင်စီတပ်သားနဲ့ လက်အောက်ခံအဖွဲ့တွေကို PDF ပူးပေါင်းအဖွဲ့က ဒီဇင်ဘာ ၁၉ ရက် ဒီနေ့မနက်ပိုင်းမှာ ဝင်ရောက်တိုက်ခိုက်ခဲ့တယ်လို့ Monywa Inventor အဖွဲ့ဆီက သိရပါတယ်။

PDF ပူပေါင်းအဖွဲ့တွေဟာ ၆၀ မမ၊ ၄၀ မမတွေအပြင် လက်နက်ငယ်တွေနဲ့ နံနက် ၉ နာရီကနေ နာရီဝက်အကြာ ဝင်ရောက်ပစ်ခတ်တိုက်ခိုက်ခဲ့တာပါ။

ဆားလင်းကြီးမြို့မရဲစခန်းနဲ့ ထွေအုပ်ရုံးတို့ဟာ တဆက်တည်းရှိပြီး စစ်သား၊ ရဲနဲ့ ပျူစောထီးအင်အား ၂၀၀ ခန့်ဟာ ၂ နှစ်နီးပါး အထိုင်ချတပ်စွဲထားတာလို့ ဆိုပါတယ်။

အဆိုပါထွေအုပ်ရုံးနဲ့ ရဲစခန်းကို ပစ်ခတ်တိုက်ခိုက်ချိန်မှာ စစ်အုပ်စုဘက်က ထိခိုက်မှုရှိနိုင်ပြီး လက်နက်ငယ်တွေ၊ ဒရုန်းတွေနဲ့ ပြန်လည်တိုက်ခိုက်ခဲ့တာကြောင့် ပြန်ဆုတ်ခဲ့ရတယ်လို့ Monywa inventor အဖွဲ့တိုက်ခိုက်တာဝန်ခံ မိုးသောက်က ပြောပါတယ်။

ဒီတိုက်ခိုက်မူကို Monywa inventor၊ Triple Twoနဲ့ ချင်းတွင်းဒိုင်းနမိုက်တို့ ပူးပေါင်းလုပ်ဆောင်ခဲ့တာဖြစ်ပြီး တိုက်ခိုက်မှုအတွင်းမှာ PDF ၁ ဦး မစိုးရိမ်ရ သေနတ်ဒဏ်ရာရခဲ့တယ်လို့ ဆိုပါတယ်။

တိုက်ခိုက်မှုအပြီးမှာ စစ်ကောင်စီဘက်က ရဲစခန်းနဲ့ ထွေအုပ်ရုံးအနီးက လူမနေတော့တဲ့ နေအိမ်တွေကိုမီးရှို့ခဲ့တာကြောင့် နေအိမ် ၅ လုံးခန့် မီးလောင်ပျက်စီးခဲ့တယ်လို့ ဆိုပါတယ်။

လက်ရှိမှာတော့ စစ်ကောင်စီတပ်ဖွဲ့ဝင်တွေဟာ ဘန်ကာတွေ ကတုတ်ကျင်းတွေကို အခိုင်အမာ ပြန်တည်ဆောက်နေကြတယ်လို့ သိရပါတယ်။

ဆားလင်းကြီးမြို့ပေါ်မှာ စစ်ကောင်စီလက်အောက်ခံအဖွဲ့တွေ တပ်စွဲထားတဲ့ ၂ နှစ်ကျော်အတွင်းမှာ မြို့ပေါ်ကဒေသခံအများစုဟာ စစ်ဘေးရှောင်နေကြရတာလို့လည်းသိရပါတယ်။

တည်းဖြတ် - HP

#မြေလတ်အသံ 

#စစ်ကိုင်း #ဆားလင်းကြီး #ရဲစခန်း #ထွေအုပ်ရုံး #တိုက်ပွဲ