ဆိပ်ဖြူမှာ စစ်ကောင်စီကင်းပုန်းကပစ်ခတ်လို့ တပ်စိတ်မှူးကျဆုံးပြီး ၁ ဦးဒဏ်ရာရ

မကွေးတိုင်း၊ ဆိပ်ဖြူမြို့နယ်မှာ စစ်ကောင်စီကင်းပုန်းရဲ့ပစ်ခတ်မှုကြောင့် ပခုက္ကူခရိုင်အမှတ် ၁၉ တပ်ရင်း၊ တပ်ခွဲ ၂ မှ တပ်စိတ်မှူးကျဆုံးပြီး တပ်ဖွဲ့ဝင် ၁ ဦးထိခိုက်ဒဏ်ရာရခဲ့တယ်လို့ အဲ့ဒီအဖွဲ့ဆီက သိရပါတယ်။ 

ဒီဇင်ဘာ ၁၀ ရက်မနက် ၉ နာရီခွဲလောက်က အသက် ၂၀ အရွယ် တပ်စိတ်မှူးရဲရင့်နဲ့ တပ်ဖွဲ့ဝင် ကျားသစ်နက်တို့ဟာ ကျွန်းချောင်းရွာကနေတပ်ဖွဲ့အထိုင်စခန်းကို ဆိုင်ကယ်နဲ့ပြန်လာချိန် ကန်စွန်းမရွာနဲ့ ဖလန်မရွာကြားအရောက်မှာ စစ်ကောင်စီကင်းပုန်းနဲ့တွေ့ပြီး ပစ်ခတ်ခံခဲ့ရတာလို့ ဆိုပါတယ်။ 

“ပြန်လွတ်လာတဲ့ ရဲဘော်ပြောပြချက်အရ သူအရင်ဆုံးစမြင်တာ၊ ကတ္တရာလမ်းပေါ်အထွက်မှာ စစ်သားကနေထပြီးတော့ သေနတ်နဲ့ချိန်တဲ့အချိန်မှာ ကိုယ့်ဘက်က ရဲဘော်ကအရင်ဆုံးဦးအောင် ပစ်လိုက်တာ၊ ပစ်ပြီးကာမှ ကျသွားတဲ့ရဲဘော်က ဂန်းတလက်ထဲပါတာကို ပစ်တဲ့ရဲဘော်ဆီက ဂန်းကို လုပစ်ပြီးတော့ကျန်နေခဲ့တာ” လို့ အမှတ် ၁၉ တပ်ရင်းမှတာဝန်ရှိသူတဦးက ပြောပါတယ်။

ပစ်ခတ်မှုအတွင်းတပ်စိတ်မှူးရဲရင့် ကျဆုံးခဲ့ပြီး ပစ်ခတ်မှုပြီးနောက် တပ်ဖွဲ့ဝင်ကျားသစ်နက်က သက်ဆိုင်ရာတပ်ဖွဲ့တွေဆီ ဆက်သွယ်လာခေါ်ခိုင်းတဲ့အတွက် အဲ့ဒီနေ့ညနေ ၄ နာရီလောက်မှာ သွားခေါ်ခဲ့ပြီး ကျဆုံးသူအလောင်းကိုတော့ ညနေ ၆ နာရီလောက်မှာ သင်္ဂြိုဟ်ပေးခဲ့တယ်လို့ ဆိုပါတယ်။ 

“သေနတ်ဒဏ်ရာက ခြေထောက်တွေထိတယ်၊ ရင်ဘတ်ကိုတချက်ထိတယ် မျက်နှာကိုလည်း တချက်ထိတယ် လက်နက်ကတော့ပါသွားတယ်၊ ရဲဘော် ကျားသစ်နက်ကခြေလျင်ပြေးရာမှာ မပြေးနိုင်တော့တဲ့အဆုံး ချုံထဲမှာပုန်းနေတာ သူ့ဆီမှာဖုန်းတွေပါသွားတယ်၊ ဖုန်းတွေကနေတဆင့် ဆက်သွယ်လို့ရတဲ့သူဆီ ဖုန်းဆက်ပြီး ဆက်သွယ်ပြီးတော့သူတို့ကိုလာခေါ်ခိုင်းတယ် ” လို့ အထက်ပါတာဝန်ရှိသူက ဆိုပါတယ်။

တပ်ဖွဲ့ဝင်ကျားသစ်နက်ကတော့ တင်ပါးကိုကျည်ထိမှန်ခဲ့တာကြောင့် လက်ရှိအချိန်ထိ ဆေးကုသမှု ခံယူနေတယ်လို့ သူကပြောပါတယ်။ 

ကျဆုံးသွားတဲ့ တပ်စိတ်မှူးရဲရင့်ဟာ ပခုက္ကူခရိုင်အမှတ် ၁၉ တပ်ရင်း တပ်ခွဲ ၂ ဆီ ၂၀၂၄၊ ဖေဖော်ဝါရီမှာ စတင်ဝင်ရောက်ခဲ့သူဖြစ်တယ်လို့ သိရပါတယ်။ 

ပခုက္ကူခရိုင်အမှတ် ၁၉ တပ်ရင်းဟာ ပြီးခဲ့တဲ့နိုဝင်ဘာ ၂၃ ရက်ရက်ကလည်း ၁၀ မိုင်လမ်းဆုံနဲ့ ဆိပ်ဖြူမြို့ကြားကားလမ်းပိုင်းတနေရာမှာ စစ်ကောင်စီတပ်သားတွေကို မိုင်းဆွဲပြီးပစ်ခတ်ခဲ့ရာ စစ်ကောင်စီတပ်သား ၆ ဦးသေဆုံးခဲ့ပါသေးတယ်။ 

စာတည်း - လင်း 

#မြေလတ်အသံ

#မကွေး #ဆိပ်ဖြူ #ကာကွယ်ရေးတပ်ဖွဲ့ဝင် #ကျဆုံး