တောင်သာမြို့နယ်က ပျူစောထီးစခန်းကို PDF ဝင်တိုက်ပြီး လက်နက်ခဲယမ်းတွေ သိမ်းဆည်း

မန္တလေးတိုင်း၊ တောင်သာမြို့နယ်၊ တလိုင်းရပ် (ရွာသစ်)ရွာရှိ ပျူစောထီးစခန်းကို ဒေသခံကာကွယ်ရေးတပ်ဖွဲ့တွေက စီးနင်းတိုက်ခိုက်ပြီး လက်နက်ခဲယမ်းတွေသိမ်းဆည်းရရှိခဲ့တယ်လို့ ပြည်သူ့လွတ်မြောက်ရေးတပ်မတော် အမှတ် ၈၁၅ တပ်ဖွဲ့ (အနောက်မြောက်စစ်ဒေသ)ဆီက သိရပါတယ်။ 

ရွာထဲရှိ ပျူစောထီးခေါင်းဆောင်ကျော်မင်းထွန်းအိမ်မှာ အင်အား ၁၅ ဦးလောက်နဲ့ စခန်းချနေတဲ့ ပျူစောထီးအထိုင်စခန်းကို နိုဝင်ဘာ ၁ ရက် မနက် ၃ နာရီခွဲမှာ တိုက်ခိုက်ခဲ့တာလို့ ဆိုပါတယ်။  

“တော်လှန်ရေးအဖွဲ့တွေ ဝင်ရောက်ပစ်ခတ်ချိန်မှာ ပျူစောထီးတွေက ၁ မိုင်လောက်ဝေးတဲ့ ဝဲလောင်ရဲစခန်းကို ထွက်ပြေးသွားတယ်။ စခန်းအရောက်မှာ သေနတ်ပစ်ဖောက်သံတွေတော့ ကြားရတယ်။ ပျူစခန်း ဝင်စီးတဲ့အချိန်မှာ သွေးကွက်တွေ တွေ့ရတယ်။” လို့ ပြည်သူ့လွတ်မြောက်ရေးတပ်မတော် အမှတ် ၈၁၅ တပ်ဖွဲ့ (အနောက်မြောက်စစ်ဒေသ)တာဝန်ရှိသူက ပြောပါတယ်။ 

တလိုင်းရပ်ရွာမှာ အိမ်ခြေ ၃၀၀ ကျော်ရှိပြီး အဲ့ဒီပျူစောထီးစခန်းဟာ လွန်ခဲ့တဲ့ ၂ နှစ်ဝန်းကျင်ကတည်းက ရှိနေတာလို့ သိရပါတယ်။ 

ထွက်ပြေးသွားတဲ့ ပျူစောထီးတွေထဲကတဦးကတော့ ပြေးရင်း လမ်းမှာသေဆုံးခဲ့တယ်လို့သိရပြီး သူနဲ့ပတ်သက်တဲ့အချက်အလက်တွေကို စုံစမ်းနေဆဲလို့ အထက်ပါတာဝန်ရှိသူက ပြောပါတယ်။ 

ဒါ့အပြင် စခန်းကိုဝင်စီးချိန်မှာ ကာဘိုင် ၁ လက်၊ ရှော့ဂန်း ၁ လက်၊ ၇.၆၂ ကျည် ၁၉၅ တောင့်၊ ကာဘိုင်ကျည် ၆၅ တောင့်၊ ရှော့ဂန်းကျည် ၃၇ တောင့်၊ လက်ပစ်ဗုံး ၁ လုံး၊ ကျည်ကာ ၁ ထည်၊ ယူနီဖောင်းတွေနဲ့အတူ ငွေကျပ် ၁ သိန်း ၅ ထောင်ကို သိမ်းဆည်းရမိခဲ့တယ်လို့ဆိုပါတယ်။ 

ကာကွယ်ရေးတပ်သားတွေ ပြန်ဆုတ်ခွာသွားပြီးနောက် အဲ့ဒီနေ့မနက် ၈ နာရီလောက်မှာပဲ ပျူစောထီးတွေဟာ ထနှောင်းကုန်းရွာ ပျူစောထီးတွေကိုပါခေါ်လာပြီး လက်ရှိ လူအင်အား ၃၀ လောက်နဲ့ တလိုင်းရပ်ရွာမှာပဲ အထိုင်ပြန်ချနေတယ်လို့ သိရပါတယ်။ 

စာတည်း - လင်း 

#မြေလတ်အသံ

#မန္တလေး #တောင်သာ #တလိုင်း #ပျူစောထီးစခန်း #တိုက်ခိုက်ခံရ