ထုတ်ပြန်ချက်ကိုမလိုက်နာလို့ ထိခိုက်ခဲ့ရင် တာဝန်ယူမှာမဟုတ်ဘူးလို့ Aera 71 အဖွဲ့ ထပ်မံထုတ်ပြန်

စစ်ကိုင်းတိုင်း၊ မုံရွာခရိုင်၊ ချောင်းဦးမြို့နယ်အတွင်းက လမ်းပိုင်းတွေအတွက် ထုတ်ပြန်ထားတဲ့သတိပေးချက်တွေကို ပြည်သူတွေအနေနဲ့လိုက်နာပေးကြဖို့ Aera71 Peoples Defense Force Page2 အဖွဲ့က မေလ ၁ ရက် ဒီနေ့မနက်က ထပ်မံသတိပေးထုတ်ပြန်ပါတယ်။

ပြည်သူတွေဘက်က လိုက်နာမှုမရှိခဲ့လို့ ဖျက်သိမ်းခဲ့ရတဲ့ ဖောက်ခွဲရေးမစ်ရှင်များစွာရှိခဲ့ပြီး အသေးစားမစ်ရှင်တခုအတွက် ကြိုတင်ပြင်ဆင်စရိတ် ကျပ် ၅ သိန်းခန့်ကုန်ကျမှုရှိတာကြောင့် ငဲ့ညှာတော့မှာမဟုတ်ဘဲ လုပ်ငန်းအောင်မြင်တဲ့အထိ ဆက်လက်ဆောင်ရွက်သွားမှာဖြစ်တယ်လို့ Aera 71 အဖွဲ့က ပြန်ကြားရေးတာဝန်ခံ Theo က မြေလတ်အသံကို ပြောပါတယ်။

" ဒီဘက်မှာ စစ်တပ်က အရပ်ဝတ်တွေအိမ်စီးကားတွေနဲ့ချည်း လှုပ်ရှားနေကြတော့ ကျနော်တို့ စာထုတ်လိုက်တဲ့အချိန် တချို့ပြည်သူတွေက မသိကြတာလား၊ ဘာလားတော့မသိဘူး။ စစ်တပ်ကကားတွေနဲ့ယှဉ်မောင်းလာတော့ ကျနော်တို့မှာ အရမ်းအကျပ်ရိုက်ရပါတယ်။ ပြောချင်တာကတော့ လမ်းပေါ်သွားလာလှုပ်ရှားနေကြတဲ့ ပြည်သူတွေအနေနဲ့ ပြည်သူ့ကာကွယ်ရေးတပ်ဖွဲ့တွေရဲ့ ထုတ်ပြန်ချက်တွေကို လေ့လာပြီးမှ အသွားအလာပြုကြစေချင်ပါတယ်" လို့ ပြောပါတယ်။