ပလက်ဝမှာ စကခ ၁၉ စကခမှူး ဗိုလ်မှူးချုပ် ဇင်မျိုးဆွေ ကို AA တပ်က ဖမ်းမိထား

ချင်းပြည်နယ်၊ ပလက်ဝမြို့နယ်အတွင်းမှာ တိုက်ခိုက်ရေးဝင်ရောက်နေတဲ့ အမှတ် ၁၉ စစ်ဆင်ရေးကွပ် ကဲမှုဌာနချုပ်ရဲ့ ဌာနချုပ်မှူး ဗိုလ်မှူးချုပ် ဇင်မျိုးဆွေကို  ရက္ခိုင့်တပ်တော်-AA က ဖမ်းဆီးရမိထားတယ်လို့ မြေပြင်နဲ့ စစ်ဘက်သတင်းတွေအရ ကနဦး သိရပါတယ်။

စစ်ဆင်ရေးကွပ်ကဲရေးမှူး ဗိုလ်မှူးချုပ် ဇင်မျိုးဆွေ ကို ပလက်ဝမြို့အနောက်ဘက် ရေတံခွန်တောင်ကုန်းအနီးမှာ ဇန်နဝါရီ ၁၂ ရက် ဒီကနေ့ မနက်ပိုင်းမှာ ဖမ်းဆီးခံရတာလို့ ဆိုပါတယ်။

“ ရေတံခွန်တောင်ကုန်းအနီးမှာ အရှင်မိတာ “ လို့ AAတပ်ဖွဲ့ဝင် မြေပြင်သတင်းရင်းမြစ်တဦးက မြေလတ်အသံကို ပြောပါတယ်။

ဗိုလ်မှူးချုပ် ဇင်မျိုးဆွေ ဟာ အလုပ်သင်ဗိုလ်အပတ်စဉ် ၂၃ ဆင်းဖြစ်ပြီး ပလက်ဝမြို့နယ်အတွင်းက ဗျူဟာကုန်းတွေကို AA တပ်တွေရဲ့ တိုက်ခိုက်သိမ်းပိုက်ခံရမှုကြောင့် ပလက်ဝမြို့ပေါ်ကို ဆုတ်ခွာနေစဉ် ဖမ်းဆီးခံရတာလို့ တပ်သတင်းရင်းမြစ်တွေကလည်း ပြောပါတယ်။

တပ်မမှူးဖမ်းဆီးရမိတဲ့ အခြေအနေတွေနဲ့ပတ်သက်ပြီး ရက္ခိုင့်တပ်တော် - AA ရဲ့ ပြောခွင့်ရသူ ခိုင်သုခ ကို မြေလတ်အသံကို ဆက်သွယ်မေးမြန်းပေမယ့် ဖုန်းလက်ခံဖြေဆိုတာမျိုး မရှိသေးပါဘူး။

ဗိုလ်မှူးချုပ် ဇင်မျိုးဆွေ ဟာ စကခ ၁၉ စကခမှူးမဖြစ်မီက လက်ရှိမြောက်ပိုင်း ၃ ဖွဲ့ သိမ်းပိုက်ထားတဲ့ ကွတ်ခိုင်အခြေချစစ်ဗျူဟာရဲ့ ဗျူဟာမှူး ဖြစ်ပြီး ၂၀၂၂ အတွင်းက စကခ ၁၉ ကို ပြောင်းရွှေ့ရောက်ရှိလာတာလို့ တပ်သတင်းရင်းမြစ်တွေထံက သိရပါတယ်။

စကခ ၁၉ နဲ့လက်အောက်ခံတပ်တွေဟာ မွန်ပြည်နယ်၊ ရေးမြို့နယ်အခြေစိုက်တပ်တွေဖြစ်ပြီး ပလက်ဝမြို့နယ်အတွင်း တိုက်ခိုက်ရေးဝင်ရောက်နေရတာ ၃ နှစ်ခန့်ရှိပြီဖြစ်ပါတယ်။

ပြီးခဲ့တဲ့ ဒီဇင်ဘာဒုတိယပတ်အတွင်းမှာလည်း တအာင်းဒေသ နမ့်ဆန်မြို့မှာ စစ်ကောင်စီတပ်ရဲ့ အမှတ် ၁၀၁ ခြေမြန်တပ်မဌာနချုပ် ဗိုလ်မှူးချုပ် မင်းမင်းထွန်းကို TNLA တပ်ဖွဲ့တွေက အရှင်ဖမ်းဆီးရမိခဲ့ပါသေးတယ်။

ပုံစာ - စကခ ၁၉ စစ်ဆင်ရေးကွပ်ကဲရေးမှူး ဗိုလ်မှူးချုပ် ဇင်မျိုးဆွေ အား ဗိုလ်မှူးချုပ်အပွင့်မတင်မီ ဗိုလ်မှူးကြီး/ဗိုလ်မှူးချုပ် အဆင့်ဖြင့်တွေ့ရစဉ်။

#မြေလတ်အသံ

#ပလက်ဝ #စကခမှူး #ဗိုလ်မှူးချုပ် #ဇင်မျိုးဆွေ #ဖမ်းဆီးခံရ #AA #စကခ၁၉ #သတင်း #ရခိုင့်တပ်တော်