ပေါက်ခေါင်းက စစ်တပ်ဂိတ်ကို PDF တိုက်ခိုက်လို့ သေဆုံးမှုရှိ

ပဲခူးတိုင်းအနောက်ခြမ်း၊ ပေါက်ခေါင်းမြို့နယ်က စစ်ကောင်စီဂိတ်စခန်းကို ဝင်ရောက်တိုက်ခိုက်ရာမှာ ထိခိုက်သေဆုံးမှုတွေရှိတယ်လို့ ပြည်ခရိုင်တပ်ရင်း ၃၆၀၁၊ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ တာဝန်ရှိသူဆီက သိရပါတယ်။

ပေါက်ခေါင်းမြို့နယ် ခရိုင်ချင်းဆက်လမ်းပေါ်ရှိ ငါးဘတ်ကုန်းရွာက အင်အား ၂၅ ဦးလောက်ရှိတဲ့ စစ်ကောင်စီဂိတ်ကို ဇန်နဝါရီ ၂၂ ရက် မနက် ၄ နာရီလောက်မှာ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့၊ တပ်ခွဲ ၂၊ ဧရာညီနောင်စစ်ကြောင်းက တိုက်ခိုက်ခဲ့တာလို့ ပြောပါတယ်။

တိုက်ခိုက်ရာမှာ ၆၀ မမ နှစ်လုံးအပြင် ၄၀ မမ နှစ်လုံးနဲ့ အရင်ပစ်ပြီးမှ လက်နက်ငယ်တွေနဲ့ တိုက်ခိုက်ခဲ့တာဖြစ်ပြီး  စစ်သား ၃ ဦးသေကာ ၃ ဦးဒဏ်ရာရတယ်လို့ ဆိုပါတယ်။

“စစ်ကောင်စီဂိတ်က မီးပြပြလေးကို မှန်းပြီး လက်နက်ကြီးနဲ့ အရင်ပစ်တာက ဂိတ်ခြံဝန်းထဲကို ကျပေါက်တော့ စစ်**တွေ ရုန်းရင်းဆန်ခတ်ဖြစ်နေတုန်း ကျနော်တို့က ဂိတ်ရဲ့ ကိုက် ၅၀ လောက်အထိ အနီးကပ်ဝင်ပြီး လက်နက်ငယ်တွေနဲ့ ပစ်တာ။ သူတို့ ကတုတ်ကျင်းတွေနားတောင်ရောက်တယ်” လို့ ပြည်ခရိုင်သတင်းပြန်ကြားရေး တာဝန်ခံက ပြောပါတယ်။

စတင်တိုက်ခိုက်ချိန်မှာ စစ်ကောင်စီဂိတ်ဘက်က ရုတ်တရက် ပြန်လည်ပစ်ခတ်နိုင်တာမျိုးမရှိဘဲ ၅ မိနစ်လောက်ကြာမှ လက်နက်ငယ်တွေ ၄၀ မမ တွေနဲ့ပြန်ပစ်နိုင်တာလို့ သူက ဆက်ပြောပါတယ်။ 

တိုက်ခိုက်မှုအပြီး မနက် ၅ နာရီခွဲ‌လောက်မှာ စစ်ကောင်စီတပ်ဟာ ပေါက်ခေါင်းမြို့ကနေ ဆိုင်ကယ် ၂ စီး၊ ကား ၁ စီးနဲ့ ရောက်လာပြီး  အလောင်းနဲ့ ဒဏ်ရာရသူတွေကို ပေါက်ခေါင်းမြို့ဘက် ပြန်သယ်သွားတာကို ကင်းထောက်တွေဆီက ပြန်ကြားရတယ်လို့ ဆိုပါတယ်။

စစ်ကောင်စီတပ်ဟာ ပေါက်ခေါင်းမြို့နယ်၊ လက်ကြီးရွာမှာလည်း ဒီဇင်ဘာလကုန်လောက်ကစတင်ကာ အင်အား ၃၀ လောက်နဲ့ အထိုင်စခန်းထပ်မံချထားပြီး နယ်မြေထိစပ်နေတဲ့ ပေါင်းတည်မြို့နယ်ထဲကို ဇန်နဝါရီ ၁၂ ရက်က  လက်နက်ကြီးနဲ့ပစ်ခတ်ရာ နတ်ရေတွင်းရွာက နေအိမ်တလုံးပေါ်ကျရောက်ခဲ့လို့ ပျက်စီးခဲ့ရပါသေးတယ်။

ပုံစာ - တိုက်ခိုက်ဖို့သွားနေသည့် ဧရာညီနောင်စစ်ကြောင်းမှ ရဲဘော်များ။ 

စာတည်း - လင်းဇေ

#မြေလတ်အသံ

#ပဲခူးတိုင်းအနောက် #ပေါက်ခေါင်းမြို့  #စစ်ကောင်စီ #ဂိတ်စခန်း #ပြည်ခရိုင်တပ်ရင်း  #၃၆၀၁ #ပေါင်းတည်မြို့နယ် #ပြည်သူ့ကာကွယ်ရေးတပ်ဖွဲ့ #သတင်း #မြေလတ်သတင်း