ပေါက်နယ်မှာ စစ်ကောင်စီစစ်ကြောင်းထိုးလို့ ဒေသခံ ၁ သောင်းကျော် မိုးရေထဲ စစ်ရှောင်နေရ

မကွေးတိုင်း၊ ပခုက္ကူခရိုင်၊ ပေါက်မြို့နယ်အတွင်းမှာ စစ်ကောင်စီတပ်သားတွေက အောက်တိုဘာလ ၂၁ ရက်ကတည်းက စစ်ကြောင်းထိုးနေတာကြောင့် ဒေသခံ ၁၀,၀၀၀ ကျော်ဟာ မိုးရေထဲမှာ ထွက်ပြေး တိမ်းရှောင်နေရပြီး စားသောက်ရေးအတွက် အခက်အခဲဖြစ်နေတယ်လို့ စစ်ဘေးရှောင်တွေက ပြောပါတယ်။  

အခုရက်ပိုင်း မိုးဆက်တိုက်ရွာသွန်းနေတဲ့ကြားက ရေခါး၊ ဂဲပင်အင်း၊ ဓာတ်တော်၊ ဝန်တင်ရွာ၊ သရက်ကန်၊ မယ်အိုကုန်း၊ ရေခါး၊ မကျီးကုန်း၊ လက်ပံတို၊ မြသိန်းတန်၊ အိုင်းမ၊ ကံသစ်၊ တဲကြီး၊ မင်းကိုင်း စတဲ့ကျေးရွာက ပြည်သူတွေ စစ်ရှောင်နေရတာဖြစ်ပါတယ်။ 

"မိုးရွာတာ ၅ ရက်ရှိပြီ။ တောတန်းတွေထဲမှာ နေကြတာများတယ်။ အလုပ်လုပ်နေရင်းနဲ့ ထွက်ပြေးလာတော့ ဘာမှကိုမသယ်နိုင်ခဲ့ဘူး။ အမိုးအကာနဲ့ စားဖို့ လိုအပ်နေပါတယ်" လို့ ရေခါးရွာသားတဦးက မြေလတ်အသံကို ပြောပါတယ်။

စစ်ကောင်စီစစ်ကြောင်းရှိနေသေးတဲ့အတွက် ရွာမပြန်နိုင်သေးဘဲ ဘေးလွတ်ရာ ထွက်ပြေးတိမ်းရှောင်နေရတဲ့ ပြည်သူတွေဟာ နီးစပ်ရာ ဆွေမျိုးအိမ်၊ စာသင်ကျောင်းနဲ့ တောတွေထဲမှာ နေထိုင်ကြရပြီး လက်ရှိမှာ စားသောက်ရေး၊ နေထိုင်ရေးနဲ့ ကျန်းမာရေးအတွက် အခက်အခဲတွေ ရှိနေတယ်လို့ ဆိုပါတယ်။ 

ပေါက်မြို့နယ် ပြည်သူ့ကာကွယ်ရေးအဖွဲ့တချို့က အစားအစာပို့တာရှိပြီး ဆေးအဖွဲ့ကလည်း ဖျားနာသူတွေကို ဆေးကုသပေးနေတာကြောင့် ဆေးဝါးလိုအပ်ချက်လည်းရှိနေတယ်လို့ စစ်ဘေးရှောင်တွေက ဆိုပါတယ်။ 

ပုံစာ - အောက်တိုဘာ ၂၁ ရက်က တောထဲမှာ စစ်ရှောင်နေကြစဥ်။ 

စာတည်း - လင်းဇေ

#မြေလတ်အသံ

#မကွေးတိုင်း #ပခုက္ကူခရိုင် #ပေါက်မြို့နယ် #စစ်ကောင်စီ #စစ်ကြောင်းထိုး #မိုးရေထဲ #စစ်ရှောင်