ပေါက်နယ်မှာ မုန်တိုင်းကြောင့် နှမ်းဧက ၁၆၀၀ ကျော်ပျက်စီးပြီး တောင်သူတွေ အခက်အခဲမျိုးစုံ ကြုံတွေ့နေရ

ပေါက်မြို့နယ်၊ ကျောချောင်းနဲ့ ယောချောင်းဘေးက ရွာပေါင်း ၉၀ ကျော်မှာလည်း ပျက်စီးတာများပြီး နှမ်းခင်းတွေ သဲတွေဖုံး၊ ရေတွင်း၊ ရေစက်၊ တိရစ္ဆာန်တွေ၊ လူနေအိမ်တွေ မျောပါ ပျက်စီးဆုံးရှုံးခဲ့ရတယ်လို့ သိရပါတယ်။

"နှမ်းခင်းက ရေဘုံဘိုင်တွင်းတွေ ပျက်စီးတယ်။ စိုက်ခင်းထဲသဲတွေဖုံးကုန်တယ်။ ရေတင်စက်တွေ နွား ဆိတ် သိုး ဝက်တွေလည်းရေထဲပါကုန်တယ်။ သေတာတွေလည်းရှိတယ်။ အိမ်တွေလည်းပြင်ရအုံးမယ်။ နောက်ရာသီစိုက်ဖို့ တောင်ဘာလုပ်ရမှန်းမသိတော့ပါဘူး။ ငွေကြေးပိုင်းကတော့ပိုဆိုးတာပေါ့ဗျာ" လို့ပေါက်ဒေသ ခံလူငယ်တဦးက မြေလတ်အသံကိုပြောပါတယ်။

နှမ်းတဧက စိုက်ပျိုးကုန်ကျစရိတ်အနေနဲ့ နှမ်းမျိုးတတင်းကို ၁ သိန်း ၁ သောင်းကျပ်၊ထွန်ယက်ခ ၁ သိန်းကျပ်၊ စိုက်ပျိုးခ တသောင်းခွဲကျပ်၊ ရေတင်ဓာတ်ဆီ ၂ သောင်းကျပ်၊ပိုးဆေးမှိုဆေးဘိုး ၄ သောင်းကျပ်၊ ရိတ်သိမ်းသယ်ယူခ ၃ သောင်းခွဲကျပ်၊ ရေတင်ခ တသောင်းခွဲကျပ် စုစုပေါင်းကုန်ကျစရိတ် ၃ သိန်းခွဲဝန်းကျင်လောက် ကုန်ကျစရိတ်ရှိတယ်လို့ ဆက်ပြောပါတယ်။

ပေါက်မြို့နယ်ကတောင်သူတွေခင်ဗျာ နှမ်းသီးနှံအပြင်၊ မြေပဲ၊ စပါး၊ ကုလားပဲ၊ ကြက်သွန်သီးနှံစိုက်ခင်းတွေမှာလည်းအပျက်အစီးတွေရှိလို့ တောင်သူတွေအနေနဲ့အခက်အခဲမျိုးစုံရင်ဆိုင်ကြုံတွေ့နေရတယ်လို့ သိရပါတယ်။

စာတည်း - လင်းဇေ
#မြေလတ်အသံ

#နှမ်းခင်း #မကွေးတိုင်း #ပေါက် #မိုခါ #အပျက်အစီး #အခက်အခဲ