ပေါင်းတည်မှာ မီးကြိုးကိုပါးစပ်နဲ့ကိုက်ခွာပြီး မီးပြင်တဲ့အမျိုးသား ဓါတ်လိုက်သေဆုံး

ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ကြူတောကန်အုပ်စု၊ ကြူတောကန်ရွာမှာ လျှပ်စစ်မီးပြုပြင်ရာက အမျိုးသားတဦး ဓါတ်လိုက်သေဆုံးသွားတယ်လို့ သိရပါတယ်။

သေဆုံးသူမှာ ကြူတောကန်ရွာနေ အသက် ၄၀ နှစ်ကျော်အရွယ် ကိုမိုးကြီး ဖြစ်ပြီး မေ ၁၉ ရက် မနေ့မနက် ၁၀ နာရီဝန်းကျင်က သူ့ရဲ့နေအိမ်ဘေးမှာ မီးကြိုးကိုပါးစပ်နဲ့ကိုက်လျက် ဓါတ်လိုက်သေဆုံးခဲ့တာလို့ ဆိုပါတယ်။

“ ပါးစပ်မှာ မီးကြိုးက ကိုက်လျက်သားနဲ့ သေနေတာ။ ပုံစံကြည့်ရတာ မီးကြိုးကာဗာကို ပါးစပ်နဲ့ကိုက်ခွာတဲ့ပုံပဲ။  မီးကလည်း မကြာခဏပြတ်လိုက်၊ လာလိုက်ဖြစ်နေတာ။ သတိလက်လွတ်ဖြစ်သွားပုံရတယ် " လို့ ပေါင်းတည်ဒေသခံတဦးက မြေလတ်အသံကို ပြောပါတယ်။

ပေါင်းတည်မြို့နယ်မှာ လျှပ်စစ်မီးက ၄ နာရီတကြိမ်လာတာဖြစ်ပေမယ့် မီးပေးထားတဲ့အချိန်အတွင်းမှာပဲ မကြာခဏ မီးပြတ်တောက်မှုဖြစ်ပေါ်သလို ယမန်နေ့ကလည်း လျှပ်စစ်မီးက မကြာခဏပြတ်တောက်တယ်လို့  အဆိုပါဒေသခံက ဆက်ပြောပါတယ်။

ပေါင်းတည်မြို့နယ်မှာ လျှပ်စစ်မီး နေ့ပိုင်း ၄ နာရီနဲ့ ညပိုင်း ၄ နာရီရရှိကာ အလှည့်ကျအသုံးပြုနေရပြီး မီးလာချိန်တွေအတွင်းမှာလည်း မကြာခဏ မီးပြတ်လိုက်၊ လာလိုက်ဖြစ်နေတာပါ။

သေဆုံးသူရဲ့ရုပ်အလောင်းကို ယမန့်နေ့မှာပဲ ပေါင်းတည်ပြည်သူ့ဆေးရုံရင်ခွဲရုံကို ပို့ဆောင်ဆေးစစ်ချက်ယူပြီး မေ ၂၀  ရက် ဒီကနေ့မှာ သင်္ဂြိုလ်မှာဖြစ်တယ်လို့  သိရပါတယ်။

ဓါတ်ပုံ - အင်တာနက်။

စာတည်း - ဟိန်းစံ

#မြေလတ်အသံ

#ပေါင်းတည် #ဓာတ်လိုက်သေဆုံး #လျှပ်စစ်မီး #ပြတ်တောက်မှု #သတင်း