ပျူရွာက လက်နက်ကြီးနဲ့ မကြာခဏပစ်လို့ ပခုက္ကူနယ်ရှိ ကင်းရွာသားတွေ ထွက်ပြေးတိမ်းရှောင်နေရ

အနောက်ဘုန်းကံကျေးရွာက ပျူစောထီးတွေဟာ ကင်းကျေးရွာကို စိတ်မထင်ရင်မထင်သလို ပစ်ခတ်နေတာမျိုး ဖြစ်ပြီး ကျေးရွာထဲကို လက်နက်ကြီး ကျည်ဆံကျတာမျိုးရှိသလို ကျေးရွာအနီးပတ်ဝန်းကျင်ကို ကျတာလည်း ရှိတယ်လို့ဆိုပါတယ်။ ဒီလို လက်နက်ကြီးတွေနဲ့ ပစ်ခတ်တာကြောင့် လူနေအိမ်တလုံးနဲ့ ဘုန်းကြီးကျောင်း တကျောင်းထိမှန် ပျက်ဆီးသွားခဲ့ပါသေးတယ်။

ဒါကြောင့် ကျေးရွာသားတွေဟာ ရွာထဲမှာ တယောက်မှမနေရဲဘဲ ရေခပ်ချိန်၊ ကျွဲ၊ နွား၊ ဆိတ် သိမ်းချိန်လောက်သာ ကျေးရွာထဲ ပြန်ကြပြီး ကျန်တဲ့အချိန်တွေမှာ တောထဲကတဲတွေဆီမှာသာ နေကြရတယ်လို့ ဒေသခံတွေက ဆိုပါတယ်။

“ရွာသားတွေက တောထဲမှာပဲ ထန်းလက်တွေနဲ့ တဲထိုးပြီးနေကြတယ်။ ထန်းပင်တွေမှာ ထန်းလက်တွေချိုးစရာ မရှိလောက်အောင်ပါပဲ။ မိုးရွာတဲ့နေ့တွေဆိုရင် ပိုဆိုးတယ်။ စစ်ကြောင်းတွေထိုးလာရင်လည်း ထပ်ပြီးထွက်ပြေးရသေးတယ်” လို့ အမည်မဖော်လိုတဲ့ ကင်းကျေးရွာက ဒေသခံတဦးက ဆိုပါတယ်။

၉ လကြာတဲ့အထိ တောထဲမှာထွက်ပြေးတိမ်းရှောင်နေရတဲ့အတွက် ဒေသခံပြည်သူတွေဟာ စားဝတ်နေရေးတွေကျပ်တည်းလာပြီး မိမိတို့ ပိုင်ဆိုင်တဲ့လယ်ယာတွေကို ပေါင်နှံကာ စားဝတ်နေရေးအတွက် ဖြေရှင်းနေရတယ်လို့ ကင်းကျေးရွာက ဒေသခံတွေက ဆက်ပြောပါတယ်။

“စားဖို့ကတော့ ရွာကပိုက်ဆံရှိတဲ့သူဆီကနေ လယ်ယာပေါင်လိုက်၊ ရွေးလိုက် တောင်သူလုပ်လိုက် လည်ပတ်ရင်း ဖြေရှင်းနေရတယ် ”လို့ ရွာခံတဦးက ဆိုပါတယ်။

စာတည်း - လင်းဇေ
#မြေလတ်အသံ