မြိုင်မှာ တိုက်ခိုက်ခံရတဲ့ စစ်အုပ်စုက အမျိုးသားတဦးကိုသတ်ခဲ့

မကွေးတိုင်း၊ မြိုင်မြို့နယ်၊ တောင်ရွာက ဒေသခံအမျိုးသားတဦးကို စစ်ကောင်စီတပ်တွေက သတ်ခဲ့တယ်လို့ ဒေသခံတွေဆီက သိရပါတယ်။ 

အသတ်ခံရသူမှာ အသက် ၅၀ အရွယ် ကိုဖြူဖြစ်ပြီး တောင်ရွာအတွင်း သူပိုင်ဆိုင်သည့် ကြက်ခြံအနီးမှာ သေနတ်နဲ့ပစ်သတ်ခံရတာလို့ ဆိုပါတယ်။ 

“သူတို့ (စစ်ကောင်စီ) တောင်ရွာက အမျိုးသားတဦးကိုလည်း သတ်သွားတယ်” လို့ THU RAIN - TR တပ်ဖွဲ့ဝာာဝန်ခံက ပြောပါတယ်။ 

အောက်တိုဘာ ၁ ရက်မနေ့ မနက် ၉ နာရီလောက်ကစပြီး တောင်ရွာဘုန်းကြီးကျောင်းမှာ တပ်စွဲနေတဲ့ စစ်ကောင်စီတပ်တွေကို THU RAIN နဲ့ မဟာမိတ်အဖွဲ့တွေက ဒရုန်းနဲ့ Fix wingကို အသုံးပြုပြီး တိုက်ခိုက်ခဲ့ပြီးနောက်မှာ အသတ်ခံလိုက်ရတာဖြစ်ပြီး ဘယ်အချိန်မှာ အသတ်ခံခဲ့ရတယ် ဆိုတာကိုတော့ မသိရှိရသေးပါဘူး။

ကာကွယ်ရေးတပ်တွေရဲ့ တိုက်ခိုက်မှုကြောင့် စစ်ကောင်စီဘက်ကလည်း သေဆုံးမှုတွေရှိခဲ့ပြီး အောက်တိုဘာ ၂ ရက်ဒီနေ့လယ်ပိုင်းမှ စစ်အုပ်စုက တောင်ရွာကနေ ၅ မိုင်အကွာရှိ နောပင်ရွာကို ထွက်သွားတယ်လို့ ဆိုပါတယ်။ 

အဲ့ဒီနောက် ကာကွယ်ရေးတပ်တွေက တောင်ရွာအတွင်း နယ်မြေရှင်းလင်းရေးလုပ်ချိန်မှာ သေဆုံးသူ ဦးဖြူရဲ့ အလောင်းကိုတွေ့ခဲ့ရတာလို့ THU RAIN - TR တပ်ဖွဲ့ဝာာဝန်ခံက ပြောပါတယ်။ 

ဒါ့အပြင် စစ်ကောင်စီဘက်က ဒုတပ်ကြပ်ရဲ့ လွယ်အိတ်တလုံးကို သိမ်းဆည်းရရှိခဲ့ပြီး အဲ့ဒီလွယ်အိတ်ထဲက ၅.၅၆ကျည် ၂၅၀ တောင့်၊ ဓာတ်မီးတလုံး၊ လေးခွတလက်နဲ့ ပိုက်ဆံ ၅၉၅၀ ကျပ်ကို ရရှိခဲ့တယ်လို့ သိရပါတယ်။ 

စာတည်း - လင်း 

#မြေလတ်အသံ 

#မကွေး #မြိုင် #စစ်ကောင်စီ #တိုက်ခိုက် #သတ်ဖြတ် #ဒေသခံ #သတင်း