မြို့သာရဲစခန်း ဒရုန်းနဲ့တိုက်ခိုက်ခံရလို့ ရဲ ၅ ဦးသေဆုံးပြီး ၄ ဦးဒဏ်ရာရဟုဆို

"အဲဒီရဲစခန်းရှေ့မှာ ဂိတ်ကြေးကောက်တာ၊ သာမန်ပြည်သူတွေကို အော်ငေါက်ပြီး ပိုက်ဆံတောင်းကြမ်းတာတွေ၊ ကားသမားတွေဆီကလည်း သူတို့ မထင်ရင်မထင်သလို တောင်းခဲ့တာတွေ ရှိနေတော့ တိုက်ခိုက်ခဲ့တာပါ။ ၅ ယောက် သေတယ်၊ ၄ ယောက် ဒဏ်ရာရတယ်" လို့ ဗိုလ်လင်းယုန် က ပြောပါတယ်။

တိုက်ပွဲမှာ သေဆုံးဒဏ်ရာရ ရဲတပ်ဖွဲ့တွေနဲ့ပတ်သက်ပြီး မြေလတ်အသံသတင်းဌာနအနေနဲ့ သီးခြား အတည်မပြုနိုင်သေးပါဘူး။

အဲဒီလိုတိုက်ခိုက်ချိန်မှာ မြို့သာရဲစခန်းမှာ အင်အား ၂၀ လောက်ရှိပြီး သေဆုံးဒဏ်ရာရသူတွေကိုတော့ မြို့သာဆေးရုံနဲ့ ငါန်းဇွန်ဆေးရုံဘက်ကို ခွဲပို့တယ်လို့ ဆက်ပြောပါတယ်။

ရဲစခန်းကို ဒရုန်းနဲ့တိုက်ခိုက်ခဲ့ရာမှာ Myingyan District Drone Strick Team၊ မြင်းခြံခရိုင်အမှတ်-၂ တပ်ရင်း၊ မြင်းခြံခရိုင်အမှတ်-၄ တပ်ရင်း NPDF၊ ငါန်းဇွန်မြို့ ပြည်သူ့ကာကွယ်ရေးတပ်ဖွဲ့ဝင် ၇ ဦးနဲ့ တိုက်ခဲ့တာလို့ ဆိုပါတယ်။

ယနေ့ မေလ ၉ ရက်နေ့မနက်ပိုင်းမှာတော့ မြို့သာစျေးနားဝန်ကျင်မှာ စစ်ကောင်စီတပ်ဖွဲ့ဝင်တွေ လုံခြုံရေးချထားတယ်လို့ ဒေသခံတဦးထံက သိရပါတယ်။

ပုံစာ - ယနေ့ မေလ ၉ ရက်နေ့ နံနက်ပိုင်းက မြို့သာဈေးအနီး စစ်ဆေးနေသည့် စစ်ကောင်စီတပ်ဖွဲ့ဝင်များ။

စာတည်း - 007
#မြေလတ်အသံ