ယင်းမာပင်မှာ  တော်လှန်ရှင်ပြု အလှူပွဲတော်ကျင်းပ

စစ်ကိုင်းတိုင်း၊ ယင်းမာပင်မြို့နယ်က ကျေးရွာတရွာမှာ တော်လှန်ရှင်ပြုအလှူတော်ပွဲကို စက်တင်ဘာ ၂၁ ရက် ဒီနေ့မနက်မှာ ကျင်းပပြုလုပ်ခဲ့တယ်လို့ ပွဲမှာပါဝင်သူတဦးက ပြောပါတယ်။ 

အဲဒီအလှူပွဲမှာ ယင်းမာပင် - ဆားလင်းကြီး ရွာပေါင်းစုံသပိတ်ကလည်း ၉၁၃ ရက်မြောက်နေ့အဖြစ် ဝန်းရံ ချီတက်ခဲ့ကြသလို ယင်းမာပင်မြောက်ခြမ်းကျေးရွာတွေက သပိတ်စစ်ကြောင်းတွေကလည်း ပူးပေါင်းပါဝင်ပေးခဲ့ကြတယ်လို့ ဆိုပါတယ်။ 

ဒါ့အပြင် တော်လှန်အလှူတော် သပိတ်စစ်ကြောင်းမှာ “ Our Ambassador Our Voice ”ဆိုတဲ့ စာသားများကို ကိုင်ဆောင်ပြီး ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းကို ထောက်ခံကြောင်းကိုလည်း ဆန္ဒထုတ်ဖော်ခဲ့ကြပါသေးတယ်။

“အလှူရှင်နဲ့ အဲ့ဘက်က သပိတ်ရဲဘော်တွေရဲ့ ဖိတ်ကြားမှုကြောင့် ကျနော်တို့ ရွာပေါင်းစုံ သပိတ်ကော်မတီဝင်အနေနဲ့ ပူးပေါင်းဝန်းရံဖြစ်တာ။ ဒီနေ့အလှူမှာ လူအင်အားက ၂၀၀ ဝန်းကျင် လောက်ရှိမယ် အချိန်ကတော့ နာရီဝက်လောက်ဘဲ ကြာတယ် ” လို့ ရွာပေါင်းစုံသပိတ်ကော်မတီ အဖွဲ့ဝင်တဦးက ပြောပါတယ်။ 

ပြည်သူတွေအနေနဲ့ ရတဲ့အချိန်၊ ရတဲ့နေရာမှာ တော်လှန်ရေးကို အားသွန်ခွန်စိုက်ပြုလုပ်သွားမှာ ဖြစ်ကြောင်း၊ အချိန်နဲ့အမျှ တော်လှန်သွေး၊ တော်လှန်စိတ်အပြည့်နဲ့ ဆက်လက်တွန်းလှန်သွားမှာ ဖြစ်တယ်လို့လည်း သူက ဆက်ပြောပါတယ်။ 

ယင်းမာပင် - ဆားလင်းကြီးရွာပေါင်းစုံသပိတ် လူငယ်တွေဟာ စက်တင်ဘာ ၂၀ ရက်ကလည်း ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းကို ထောက်ခံကြောင်း ရေပေါ်သပိတ် ပြုလုပ်ခဲ့ကြပါသေးတယ်။

စာတည်း - လင်းဇေ 

#မြေလတ်အသံ

#စစ်ကိုင်းတိုင်း #ယင်းမာပင်မြို့နယ် #တော်လှန်ရှင်ပြုအလှူ #ဆားလင်းကြီး #သပိတ်ကော်မတီ #ဦးကျော်မိုးထွန်း