ရွှေဘိုက ပျူစခန်းစသိမ်းတိုက်ပွဲမှာ ပျူ၃ဦးသေပြီး ၆၀ဦးဖမ်းမိ

စစ်ကိုင်းတိုင်း၊ ရွှေဘိုမြို့နယ်၊ မြင်းချင်းရွာရှိ ပျူစောထီး အထိုင်စခန်းကို ဒီဇင်ဘာ ၂၄ ရက်က ကာကွယ်ရေး ပူးပေါင်းတပ်ဖွဲ့တွေ တိုက်ခိုက်သိမ်းပိုက်ခဲ့ရာ ပျူစောထီး ၃ဦး သေဆုံးပြီး ၆၀ ဦးကို ဖမ်းဆီးရမိခဲ့တယ်လို့ ရွှေဘို ခရိုင်အမှတ် ၁၈ တပ်ရင်းဆီက သိရပါတယ်။

မြင်းချင်းကျေးရွာရှိ ပျူစောထီးစခန်းကို မနက် ၃ နာရီအချိန်မှာ ပူးပေါင်းတပ်ဖွဲ့ဝင်တွေက စတင်တိုက်ခိုက်ခဲ့ရာ နံနက် ၅ နာရီအချိန်မှာ စခန်းသိမ်းနိုင်ခဲ့တာဖြစ်ပါတယ်။ 

"တိုက်ခိုက်တာ ၁ နာရီကျော်ကြာတယ်။ ၃ ဦးသေတယ်။ လက်နက် ၆ လက်ပါရတယ်။ ဖမ်းဆီးမိတဲ့သူတွေလည်းရှိတယ်" လို့ ရွှေဘိုခရိုင်အမှတ် ၁၈ တပ်ရင်း၊ တပ်ထောက်တာဝန်ခံ နေမျိုးပဲခူးက ပြောပါတယ်။

အဲဒီစခန်းသိမ်းတိုက်ပွဲမှာ ရဲတပ်သား ၁ ဦး၊ ပျူစောထီးလက်နက်ကိုင် ၂ ဦးသေဆုံးပြီး  တလုံးထိုးသေနတ် (၉ လုံးကျည်သုံး) ၅ လက်၊ ကာဘိုင် ၁ လက် စုစုပေါင်း လက်နက်ငယ် ၆ လက်သိမ်းဆည်းရရှိခဲ့တယ်လို့ သူက ဆက်ပြောပါတယ်။

စစ်သုံ့ပန်းအဖြစ် ပျူစောထီး အမျိုးသား ၂၉ ဦး၊ အမျိုးသမီး ၃၁ ဦးတို့ကိုလည်း အရှင်ဖမ်းဆီးရမိကာ စစ်သုံ့ပန်းမူဝါဒနဲ့အညီ ထိန်းသိမ်းထားပြီး ပျူစောထီးအဖြစ်အတင်း အဓမ္မ စုဆောင်းခံရသူများနဲ့ သာမန်အရပ်သားများကို စနစ်တကျ စီစစ်ခွဲခြားကာ ကောင်းမွန်စွာ ထိန်းသိမ်းစောင့်ရှောက်ထားတယ်လို့ ဆိုပါတယ်။

အဲဒီစခန်းသိမ်းတိုက်ပွဲမှာ ရွှေဘိုခရိုင်အမှတ် - ၂၆ တပ်ရင်း MDF - Shwebo၊ ရွှေဘိုခရိုင်အမှတ် - ၁၅ တပ်ရင်း၊ ရွှေဘိုခရိုင်အမှတ် - ၁၇ တပ်ရင်း၊ ရွှေဘိုခရိုင် အမှတ် ၁၈-တပ်ရင်းနဲ့ တပ်ခွဲ ၁ ကြောင်လက်သည်း၊ တပ်ခွဲ ၂ ဝက်လက်မင်းသားကြီး၊ တပ်ခွဲ ၃ FingersThree ၊ တပ်ခွဲ ၄ ကျားလေး၊ တပ်ခွဲ ၅ အင်းဘဲ၊ တပ်ခွဲ ၆ ဝက်လက် မီးတောက်အဖွဲ့နဲ့ နယ်မြေခံ ပကဖတပ်ဖွဲ့တွေက ပူးပေါင်းပါဝင်တိုက်ခိုက်ခဲ့တာလို့ သိရပါတယ်။

စာတည်း-လင်းဇေ

#မြေလတ်အသံ

#စစ်ကိုင်းတိုင်း #ရွှေဘို #ပျူရွာစခန်း #တိုက်ခိုက်သိမ်းပိုက် #PDFတပ်ဖွဲ့ #သေဆုံး #လက်နက်သိမ်းဆည်း #ဖမ်းဆီးရမိ #မြေလတ်သတင်း