လက်ယက်မရွာ လေယာဥ်နဲ့ဗုံးကြဲခံရလို့ ၆ နှစ်အရွယ်ကလေး ၁ ဦးအပါ ၆ ဦးသေဆုံး - သေဆုံးသူတွေထဲ မိသားစုဝင် ၄ ဦးပါဝင်

မကွေးတိုင်း၊ မြိုင်မြို့နယ်၊ လက်ယက်မရွာမှာ စစ်တပ်က လေကြောင်းနဲ့တိုက်ခိုက်ခဲ့လို့ အသက် ၆ နှစ်အရွယ် ကလေး ၁ ဦးအပါ ၆ ဦးသေဆုံးခဲ့ပါတယ်။

မကွေးလေတပ်က တက်လာတဲ့ ဂျက်ဖိုက်တာတစီးဟာ စက်တင်ဘာ ၆ ရက် ဒီနေ့ နေ့လယ် ၁ နာရီဝန်းကျင်မှာ လက်ယက်မရွာရဲ့ စာသင်ကျောင်းအနီးတဝိုက်ကို ဗုံးကြဲတိုက်ခိုက်ခဲ့တာလို့ မြိုင်မြို့ခံတဦးက ပြောပါတယ်။

လေကြောင်းတိုက်ခိုက်မှုကြောင့် အသက် ၆ နှစ်အရွယ်ကလေး ၁ ဦးအပါ ၆ ဦးသေဆုံးပြီး ၃ ဦးဒဏ်ရာရသလို စာသင်ဆောင် ၃ ဆောင်၊ နေအိမ် ၃ လုံး၊ နွား ၇ ကောင်၊ ကား ၁ စီး ထိမှန်ပျက်စီးသွားတယ်လို့ ဆိုပါတယ်။

“ဗုံးသီး ၃ လုံးချသွားတယ်၊ ပထမ တလုံးက စာသင်ကျောင်းဆောင်ရဲ့ အစပ်နားကိုကျတယ်။ နောက်တလုံးက စာသင်ကျောင်းရဲ့အရှေ့ဘက်မှာရှိတဲ့ အိမ်နားကိုကျတယ်။ နောက်ဆုံးတလုံးက ရွာအပြင်ဘက်ကိုကျတယ်။ ရွာမှာ ဘာမှလည်းမရှိဘူး တိုက်ပွဲလည်းမရှိဘူး။ အဖွဲ့အစည်းနဲ့ ပတ်သက်တဲ့ အစည်းအဝေးလည်းမရှိဘူး။ လုံးဝအလွတ်ကြီးကို လာလုပ်သွားတာ။ ဆုံးသွားတဲ့သူ ၆ ဦးထဲမှာ ၄ ဦးကတော့ မိသားစုဝင်တွေပါ။” လို့မြိုင်နယ်ခံတဦးက ပြောပါတယ်။

ဒေါ်ချိုချိုဝင်း ၅၈ နှစ်၊ သားကြီးဖြစ်သူ မောင်သန့်ဇင်ထွန်း ၃၇ နှစ် ၊ သားငယ် မောင်တင်မျိုးထွန်း ၃၅ နှစ် ၊ မြေးဖြစ်သူ မငွေဇင်ပြုံး ၆ နှစ်၊ ဒေါ်မြအေး ၆၀ နှစ်၊ မရတီကျော် ၁၈ နှစ် တို့ ထိမှန်သေဆုံးခဲ့ပါတယ်။

ဦးသန်းဌေး၊ သမီးဖြစ်သူ မသန္တာအောင်၊ မြေးဖြစ်သူ မဆွေဇင်ပြုံးတို့ ၃ ဦးက ဒဏ်ရာရရှိခဲ့သလို သမီးနဲ့ မြေးဖြစ်သူ ၂ ဦးကတော့ စိုးရိမ်ရတဲ့အခြေနေရှိပြီး ဆုံးသွားတဲ့ မိသားစု ၄ ဦးနဲ့ ဒဏ်ရာရသူတွေဟာ မိသားတစုတည်းကပါ။

“ဆုံးသွားတဲ့ ဒေါ်ချိုချိုဝင်းတို့ ၄ ယောက် ဗုံးခိုကျင်းထဲမှာပုန်းရင်းနဲ့ ဗုံးခိုကျင်းအစပ်ကို ပေါင်ဗုံးကတည့်တည့်လာကျတော့ အထဲမှာတင် ၄ ဦးလုံးသေသွားတာ။ မရတီကျော် ဆိုင်ကယ်နဲ့ စျေးဝယ်ပြီး ကျောင်းနားကနေအဖြတ် ဗုံးက သူ့ရဲ့နောက်ကျော မီတာ ၅၀ လောက်အကွာကနေကျတာ။ အစတွေထိပြီး နားစည်ပွင့်ပြီးသေသွားတယ်။ ပွိုင့် ၅ ကျည်လည်းထိတယ်လို့ပြောတယ်။ ဒေါ်မြအေးကတော့ ဆေးရုံရောက်မှ ဆုံးသွားတာ။”လို့ သူကဆက်ပြောပါတယ်။

ဗုံးကြဲခံလိုက်ရတဲ့ အထက်တန်းကျောင်းဟာ ပိတ်ထားတာ ၁ နှစ်ဝန်းကျင်ရှိပြီး အဲ့ဒီကျောင်းထဲမှာ စစ်ရှောင်ပြည်သူ ၆၀ ဝန်းကျင်လောက် ခိုလှုံနေကြတာဖြစ်ပါတယ်။

လက်ယက်မရွာဟာ ပထမဆုံးအကြိမ်လေကြောင်းက တိုက်ခိုက်ခံရတာဖြစ်ပြီး ထွက်ပြေးတိမ်းရှောင်နေကြတဲ့ ဒေသခံတွေဟာ ကျေးရွာထဲမှာ ပြန်နေထိုင်နေပြီဖြစ်တယ်လို့ သိရပါတယ်။

စာတည်း - ဈာန်မြင့်

#မြေလတ်အသံ

#မကွေး #မြိုင် #လက်ယက်မရွာ #လေကြောင်းတိုက်ခိုက်မှု #သေဆုံး