ဝက်လက်နယ်မှာ စစ်ကောင်စီတပ်စွဲထားတဲ့ ကျေးရွာတွေအနီး စပါးစိုက်ပျိုးနိုင်ခြင်းမရှိ

စစ်ကိုင်းတိုင်း၊ ဝက်လက်မြို့အနီးနဲ့ စစ်ကောင်စီတပ်စွဲထားတဲ့ ကျေးရွာဝန်းကျင်က လယ်ကွင်းတွေမှာ စပါးစိုက်ပျိုးနိုင်ခြင်းမရှိဘူးလို့  ဒေသခံတဦးက ပြောပါတယ်။

ဝက်လက်မြို့အနီးနဲ့ ဟန်လင်း၊ စိုင်နံကြီး၊ စိုင်နံလေး၊ ရသာကြီးနဲ့ ပဒူကျေးရွာဝန်းကျင်တွေက လယ်ကွင်းတွေမှာဖြစ်ပြီး အဲဒီရွာတွေက ဒေသခံတွေဟာ တိမ်းရှောင်နေရတာအပြင် ဝင်ရောက်လုပ်ကိုင်သူတွေကို စစ်တပ်နဲ့ပျူစောထီးတွေက သေနတ်နဲ့ပစ်ခတ်တာတွေကြောင့် စပါးစိုက်ပျိုးနိုင်ခြင်းမရှိတာလို့ ဆိုပါတယ်။

“စပါးစိုက်ဖို့မပြောနဲ့ လယ်ကွင်းထဲသွားတာတောင် စစ်**တွေ ပျူ**တွေက သေနတ်နဲ့ပစ်နေတာ၊ ဘယ်လယ်သမားက စပါးဆင်းစိုက်ရမလဲ။ လယ်ကွင်းတွေ ဒီအတိုင်းပဲလွှတ်ထားရတာ ဧကအရေအတွက်တော့ မပြောတတ်ဘူး တော်တော်များတယ်'' လို့ ဒေသခံအမျိုးသမီးတဦးက ပြောပါတယ်။

စပါးစိုက်ပျိုးရာမှာ ထွန်ယက်သူ ပျိုးနုတ်ကောက်စိုက်သူတွေနဲ့ လူအင်အားအများအပြားသုံးရတာကြောင့် ဌားရမ်းရင်လည်းလုပ်မယ့်သူ မရှိဘူးလို့ သူက ဆက်ပြောပါတယ်။

လက်ရှိမှာတော့ ဝက်လက်မြို့နယ်ထဲကကျေးရွာတွေမှာ ၂၄ ပြည်ပါဆန်ချော ၁ အိတ်ကို ကျပ် ၁ သိန်း ၁ သောင်းဈေးပေါက်ကာ ဒေသခံအများစုစားသုံးတဲ့ ဆန်ကြမ်း ၁ အိတ်ကိုတော့ ကျပ် ၈ သောင်းခွဲဈေး ပေါက်နေပြီး အာဏာမသိမ်းခင်ကထက် ထက်ဝက်ကျော်တက်သွားတာလို့ ဆိုပါတယ်။

အခုနှစ်ဇန်နဝါရီလကလည်း ဝက်လက်မြို့အနီး ရွှေဘိုမြို့နယ်၊ ဇီးဖြူကုန်းရွာနဲ့ သီးလုံးရွာဝန်းကျင်က မိုးစပါးခင်းတွေကို ရိတ်သိမ်းနေတဲ့ စပါးရိတ်ခြွေစက်နဲ့ထော်လာဂျီ ၁ စီးကို စစ်တပ်နဲ့ပျူစောထီးတွေက သိမ်းယူခဲ့လို့ စပါးစိုက်ခင်း ဧကရာဂဏန်းကျော် ရိတ်သိမ်းခွင့်ဆုံးရှုံးခဲ့ပါသေးတယ်။

ပုံစာ - ဝက်လက်မြို့နယ်ကစပါးမစိုက်ရသေးတဲ့လယ်ကွင်းများ။

စာတည်း - နွေဦးငြိမ်းချမ်း

#မြေလတ်အသံ

#သတင်း #စစ်ကိုင်းတိုင်း #ဝက်လက် #ရွှေဘို #ကျေးရွာ #စိုက်ပျိုးရေး #မိုးစပါး #စစ်ကောင်စီ #ပျူစောထီး