Sharing Information to the Local
သတင်း
- - သတင်းတို
- - စီးပွားရေး
- - ရွေးကောက်ပွဲ
- - နိုင်ငံရေး
- - အင်တာဗျူး
- - မှုခင်း
- - ကျန်းမာရေး
- - ပညာရေး
- - အလုပ်သမား
- - သမိုင်း
- - ပေးစာ
- - စစ်ရှောင်
- - တိုက်ပွဲ
- - သဘာဝဘေး
အင်းတော်အဝင်ဂိတ်မှာ စစ်ကောင်စီက ဓာတ်ပုံနဲ့တိုက်စစ်ပြီး ဖမ်းဆီးမှုတွေပြုလုပ်
စစ်ကိုင်းတိုင်း၊ အင်းတော်မြို့အဝင်ဂိတ်မှာ စစ်ကောင်စီတပ်ဖွဲ့တွေက ဓာတ်ပုံနဲ့တိုက်စစ်ပြီး ဖမ်းဆီးစစ်ဆေးမှုတွေ ပြုလုပ်နေတယ်လို့ ဒေသခံတွေဆီက သိရပါတယ်။
မေလ ၁၃ ရက် ဒီနေ့မနက်ပိုင်းမှာ အင်အား ၁၅ ယောက်နီးပါးရှိတဲ့ စစ်ကောင်စီတပ်ဖွဲ့တွေက အင်းတော်မြို့ထဲက လဝက၊ အုပ်ချုပ်ရေးမှူးတွေနဲ့ပေါင်းပြီး လမ်းသွားလမ်းလာပြည်သူတွေကို ဖမ်းဆီးစစ်ဆေးကာ ငွေကြေးတောင်းခံတာတွေ ပြုလုပ်နေတယ်လို့ အင်းတော်မြို့ခံတဦးက ပြောပါတယ်။
“ဒီမနက် အဖမ်းခံရတာ အမျိုးသမီး ၂ ဦးရှိပြီလို့ကြားတယ်။ နောက်ဆက်တွဲကိုတော့ စုံစမ်းနေတုန်းပါ။ စကစတွေက အိမ်ထောင်စုစာရင်းတွေယူပြီး အဲဒီအိမ်ထောင်စုစာရင်းထဲက ပျောက်နေတဲ့ရွာသားတွေကို အဓိကဖမ်းနေတာ။ ကားတွေ၊ ဆိုင်ကယ်တွေဆီကလည်း ပိုက်ဆံတွေ ကောက်တယ်။ တစီးကို ၅ ထောင်ကနေ ၃ ထောင်အထိ ကောက်ခံတာတွေလုပ်နေတယ်။ အခုချိန်ထိလည်း စစ်ဆေးနေတုန်း” လို့ မြို့ခံက ဆိုပါတယ်။
အင်းတော်မြို့အဝင်အထွက် ဂိတ်တွေမှာ စစ်ကောင်စီတပ်ဖွဲ့တွေက ကင်းပုန်းတွေဝပ်ပြီးနေကြသလို ဂိတ်တွေချပြီး ကား၊ ဆိုင်ကယ်တွေဆီကနေ ငွေကြေးကောက်ခံနေတာဟာ ၂ နှစ်နီးပါးရှိပြီ ဖြစ်တယ်လို့လည်း ဆိုပါတယ်။
ပြီခဲ့တဲ့မတ်လ ၂၄ ရက်နေ့ကလည်း မံဟဲရွာသား ၅ ဦးကို စစ်ကောင်စီက ဖမ်းဆီးခေါ်ဆောင်သွားပြီး ၁ လအကြာမှာတော့ အဲဒီလူငယ် ၅ ဦးရဲ့ ရုပ်အလောင်းကို မော်လူးမြို့တောင်ဘက် ၄ မိုင်အကွာရှိတဲ့ တောထဲမှာတွေ့ရှိခဲ့တယ်လို့ Indaw Revolution – IR ကထုတ်ပြန်ထားပါသေးတယ်။
အလားတူ အင်းတော်မြို့အနောက်ဘက် ၈ မိုင်အကွာမှာရှိတဲ့ အောင်းကုန်း−နန့်သာ−အင်ပင်ရွာတွေဘက်မှာ စစ်ကောင်စီတပ်ဖွဲ့က မတ်လ ၂၀ ရက်နေ့ကစပြီး ယနေ့အထိ တပ်စွဲထားတဲ့အတွက် ကျေးရွာ ၃ ရွာက ဒေသခံပြည်သူ ၆၀၀၀ နီးပါး စစ်ရှောင်နေရသလို စိုက်ပျိုးထားတဲ့ပဲတွေ ကောက်ချိန်ရောက်ပြီ ဖြစ်ပေမဲ့လည်း မကောက်ရဘဲရှိနေသေးတယ်လို့ သိရပါတယ်။
စာတည်း-007
#မြေလတ်အသံ