အမ်းမြို့တိုက်ပွဲကဆုတ်ခွာလာတဲ့စစ်ကြောင်း လမ်းမှာတိုက်ခိုက်ခံရပြီး စစ်သား ၂ ဦးသေဆုံး ၁၄ ဦးဖမ်းဆီးခံရ

မကွေးတိုင်း၊ ငဖဲမြို့နယ်နဲ့ ရခိုင်ပြည်နယ်၊ အမ်းမြို့နယ်အစပ် တမိုင်ကုန်းစခန်းက ဆုတ်ခွာလာတဲ့စစ်ကြောင်းကို တိုက်ခိုက်ခဲ့ရာ စစ်သား ၂ ဦးသေဆုံးပြီး ၁၄ ဦးဖမ်းဆီးရမိခဲ့တယ်လို့ ကျောင်းသားလက်ရုံးတပ်တော် - SAF တပ်ဖွဲ့ဆီက သိရပါတယ်။

တမိုင်ကုန်းစခန်းကဆုတ်ခွာလာတဲ့ ဗိုလ်မှူး ဇော်ထက်နောင်ဦးစီး စစ်ကောင်စီတပ်အင်အား ၃၀ ကျော်ကို နိုဝင်ဘာ ၂၃ ရက်က  အမ်း-ပဒါန်းလမ်းပိုင်းတနေရာမှာ မဟာမိတ်ပူးပေါင်းအဖွဲ့တွေက ၁၅ မိနစ်ကျော်အကြာ တိုက်ခိုက်ခဲ့တာလို့ ဆိုပါတယ်။

"လွန်ခဲ့တဲ့ ၂ ပတ်လောက်က အမ်းကနေ ဆုတ်ခွာထွက်ပြေးလာကြတာပါ။ ကျနော်တို့နဲ့ တိုက်ပွဲဖြစ်ပြီးတော့ ဖွဲ့စည်းပုံပျက်သွားတယ်။ လက်နက်ချတဲ့သူချ၊ ထွက်ပြေးတဲ့သူပြေးနဲ့ ၁၄ ဦး လက်ရဖမ်းဆီးနိုင်ခဲ့တာပါ။" လို့ SAF စစ်ဦးစီးချုပ် မင်းလတ်ဥက္ကာ က ပြောပါတယ်။

အမ်းမြို့၊ အနောက်ပိုင်းတိုင်းစစ်ဌာနချုပ်(နပခ)နဲ့ အနီးတဝိုက်ရှိ စစ်ကောင်စီတပ်၊ စခန်းတွေကို အာရက္ခတပ်တော် - AA က ထိုးစစ်ဆင်တိုက်ခိုက်လျက်ရှိပြီး အဲ့ဒီထိုးစစ်တွေအတွင်း အမ်း နပခနဲ့ လက်အောက်စစ်ကောင်စီတပ်၊ စခန်းတွေ သိမ်းပိုက်ရရှိထားကာ စစ်ကောင်စီတပ်သားတွေ ထိခိုက်သေဆုံးများပြားနေသလို စခန်းစွန့်ခွာပြီး အမ်း-ပဒါန်းလမ်းပိုင်းတွေဘက်ကို အသီးသီးဆုတ်ခွာထွက်ပြေးနေတာလို့ ဆိုပါတယ်။

အဲ့ဒီတိုက်ပွဲမှာ စစ်သား ၂ ဦးသေဆုံးကာ ၁၄ ဦးကို စစ်သုံ့ပန်းအဖြစ်ဖမ်းဆီးမိခဲ့ပြီး MA 1 သေနတ် ၁ လက်၊ ပစ္စတို ၁ လက်၊ လက်ကိုင်ဖုန်းနဲ့ စာရွက်စာတမ်းတချို့ သိမ်းဆည်းရရှိခဲ့တယ်လို့ သူကဆက်ပြောပါတယ်။

ဖမ်းဆီးရမိစစ်ကောင်စီတပ်ဖွဲ့ဝင်တွေကို SAF က ဆေးဝါးကုသပေးနေပြီး စစ်သုံ့ပန်းမူဝါဒအတိုင်းထိန်းသိမ်းထားကာ တိုက်ပွဲအတွင်းလွတ်မြောက်နေတဲ့ စစ်ကောင်စီတပ်ဖွဲ့ဝင်တွေကို ဖမ်းဆီးနိုင်ဖို့အတွက်လည်း နယ်မြေရှင်းလင်းတာတွေ လုပ်ဆောင်နေတယ်လို့ SAF တပ်ဖွဲ့ စစ်ဦးစီးချုပ်က ပြောပါတယ်။

တိုက်ခိုက်မှုကို ကျောင်းသားလက်ရုံးတပ်တော် SAF၊ အရှိုချင်းကာကွယ်ရေးတပ် ACDF နဲ့ မင်းဘူးခရိုင် အမှတ် ၂ တပ်ရင်းတို့က ပူးပေါင်းတိုက်ခိုက်ခဲ့တယ်လို့ ဆိုပါတယ်။

ပြီးခဲ့တဲ့ နိုဝင်ဘာ ၁၅ ရက်ကလည်း ကင်းပုန်းဝပ်ဖို့ထွက်လာတဲ့စစ်သားတွေကို အမ်း-ပဒါန်းလမ်းပိုင်း ခွန်ဇူရွာလမ်းခွဲမှာ တော်လှန်ရေးတပ်ဖွဲ့ဝင်တွေ တိုက်ခိုက်ခဲ့ရာ စစ်သား ၄ ဦး သေဆုံးပြီးလက်နက်၊ ခဲယမ်းတွေလည်း သိမ်းဆည်းရရှိခဲ့တယ်လို့ သိရပါတယ်။

ပုံစာ - ဖမ်းဆီးမိသည့် စစ်သားတချို့နှင့် လက်နက်ခဲယမ်းများကို တွေ့ရစဥ်။

စာတည်း - ဟိန်းစံ

#မြေလတ်အသံ

#အမ်း #နမခ #စစ်တပ် #ဖမ်းဆီး #ငဖဲ