အုတ်ဖိုမှာ ရဲနဲ့ပျူစောထီးတွေကိုရှင်းလင်းရာ ရဲတဦးသေ၊ ပြည်သူတဦးပါသေဆုံးခဲ့လို့ မြေအောက်ပြောက်ကျားအဖွဲ့ တောင်းပန်

ပဲခူးတိုင်းအနောက်ခြမ်း၊ သာယာဝတီခရိုင်၊ အုတ်ဖိုမြို့နယ်က ရဲတပ်ဖွဲ့ဝင်တွေနဲ့ ပျူစောထီးဆိုသူတွေကို ပြည်သူ့ကာကွယ်ရေးတပ်ဖွဲ့တွေက တိုက်ခိုက်ခဲ့ရာ ရဲတဦးသေဆုံးခဲ့သလို သာမန်ပြည်သူတဦးပါ ထိခိုက် သေဆုံးခဲ့တာကြောင့် မစ်ရှင်ကိုဖော်ဆောင်ခဲ့တဲ့ မြေအောက်ပြောက်ကျားတပ်ဖွဲ့ - အုတ်ဖိုက မိသားစုဝင်တွေကို တောင်းပန်ထားတယ်လို့ သိရပါတယ်။ 

အုတ်ဖိုမြို့နယ်၊ ဂုံညင်းတန်းကျေးရွာ ရန်ကုန်-ပြည်ကားလမ်းဘေးရှိ "Shine Cafe"ဆိုင်မှာ ရဲတပ်ဖွဲ့ဝင်တွေနဲ့ ပျူစောထီးဆိုသူတွေရှိနေချိန် မတ် ၃ ရက် မနေ့ ညနေ ၃ နာရီခွဲကျော်လောက်က သာယာဝတီခရိုင်တပ်ရင်း ၃၈၀၂၊ တပ်ခွဲ ၄၊ မြေအောက်ပြောက်ကျားတပ်ဖွဲ့ - အုတ်ဖိုက တိုက်ခိုက်ခဲ့တာလို့ ဆိုပါတယ်။

တိုက်ခိုက်မှုကြောင့် အုတ်ဖိုမြု့နယ် ရဲတပ်ဖွဲ့က နယ်ထိန်းရဲတပ်သား မင်းသွေးအပါအဝင် သာမန်အရပ်သားတဦးပါ သေဆုံးခဲ့တာဖြစ်ပါတယ်။  

ပျူစောထီးလို့ ကနဦးသိထားရတဲ့ သေဆုံးသူတဦးမှာ သာမန်ပြည်သူတဦးဖြစ်တဲ့အတွက် လွန်စွာစိတ်မကောင်းဖြစ်ရပြီး ကျန်ရစ်သူမိသားစုဝင်တွေကို အနူးအညွတ်တောင်းပန်ပါတယ်လို့ မြေအောက်ပြောက်ကျားတပ်ဖွဲ့က ထုတ်ပြန်ပါတယ်။ 

ဆိုင်အတွင်း ရဲတပ်ဖွဲ့ဝင် ၃ ဦးနဲ့ ပျူ‌စောထီး ယူဆရသူ ၂ ဦးရှိနေအချိန် တိုက်ခိုက်ခဲ့တာဖြစ်တယ်လို့ မြေအောက်ပြောက်ကျားတပ်ဖွဲ့ - အုတ်ဖိုရဲ့ တာဝန်ရှိသူတဦးက ပြောပါတယ်။ 

လက်ရှိအချိန်မှာ ပြည်သူတွေအနေနဲ့ အုပ်ချုပ်ရေးမှူး၊ ရာအိမ်မှူး၊ ပျူစောထီးတွေ၊ ရဲတွေ၊ စစ်သားတွေနဲ့  လွတ်ကင်းအောင်နေဖို့နဲ့ စစ်ရေးအရှိန်မြင့်လာတာကြောင့် နေအိမ်တွေမှာလည်း လက်ခံတာတွေ မလုပ်ဖို့အပြင် မလိုအပ်ဘဲ သွားလာတာတွေ မလုပ်ကြဖို့ ပြည်သူတွေကို မေတ္တာရပ်ခံတယ်လို့ သူကဆက်ပြောပါတယ်။ 

ပြီးခဲ့တဲ့ ဇန်နဝါရီ ၇ ရက် မွန်းလွဲ ၂ နာရီလောက်ကလည်း အုတ်ဖိုမြို့နယ်၊ မြောင်ကျေးရွာမှာ စစ်ကောင်စီက လုံခြုံရေးယူကာ အုပ်ချုပ်ရေးမှူး ကိုကျော်ကိုကို  ဦးဆောင်တဲ့ လောင်းကစားဝိုင်းကို ဝင်ရောက်စီးနင်းရာက ကိုကျော်ကိုကိုနဲ့ စစ်သားတဦးအပါ ပျူစောထီး ၃ ဦးသေပြီး လက်လုပ်သေနတ် ၂ လက် လက်ပစ်ဗုံး ၂ လုံးနဲ့  စစ်ယူနီဖောင်း ၈ စုံအပြင် ငွေသားအချို့ သိမ်းဆည်းခဲ့ပါသေးတယ်။

ပုံစာ - မှားယွင်းပစ်ခတ်မိသဖြင့် သေဆုံးခဲ့သည့် အရပ်သား ။

စာတည်း-လင်းဇေ

#မြေလတ်အသံ

#ပဲခူးတိုင်း #အုတ်ဖိုမြို့ #မြေအောက်ပြောက်ကျားတပ်ဖွဲ့ #မှားယွင်းပစ်ခတ် #တောင်းပန်