ပေါက်ခေါင်းမှာ တပ်သတင်းပေးဆိုသူ အငြိမ်းစားတပ်အရာရှိ ၁ ဦး သေနတ်နဲ့ရှင်းလင်းခံရ

ပဲခူးတိုင်းအနောက်ပိုင်း၊ ပြည်ခရိုင်၊ ပေါက်ခေါင်းမြို့နယ်မှာ အငြိမ်းစားစစ်တပ်အရာရှိ ဗိုလ်ကြီးတဦးကို စက်တာဘာ ၇ ရက် ညနေပိုင်းက သုတ်သင်ရှင်းလင်းလိုက်တယ်လို့ ပြည်ခရိုင်တပ်ရင်း ၃၆၀၂ ထံက သိရပါတယ်။

ပစ်ခတ်ရှင်းလင်းခံရသူဟာ ချောင်းဂွကြီး ရေထိန်းတမံချက် ၂ နဲ့ ၃ ကြားရှိ ဦးပိုင်ရုံးဝန်းအတွင်းနေထိုင်တဲ့ စစ်တပ်အငြိမ်းစားဗိုလ်ကြီး သန်းဝင်း ဆိုသူဖြစ်ပြီး ညနေ ၄ နာရီခန့် ယာထဲကပြန်လာချိန် တောင်နဝင်းဆည်၊ မြောင်းမကြီးတာရိုးပေါ်မှာ သေနတ်နဲ့ပစ်ခတ်ခဲ့တာလို့ ဆိုပါတယ်။

“ပြည်သူတွေနဲ့ တော်လှန်ရေးသမားတွေအပေါ်  နည်းမျိုးစုံနဲ့ နှောင့်ယှက်၊ ဂုတ်သွေးစုပ်ဒုက္ခပေးခဲ့တယ် ။ စကစရဲ့ ဒေါက်တိုင်လုပ်နေလို့ ရှင်းလင်းခဲ့တာပါ။ သေနတ်နဲ့ ၂ ချက်ပစ်တာ နေရာတင်ပွဲချင်း ပြီးသေတယ် " လို့ တပ်ဖွဲ့သတင်းတာဝန်ခံက မြေလတ်အသံကို ပြောပါတယ်။

အငြိမ်းစားဗိုလ်ကြီး သန်းဝင်းဟာ စစ်သားနဲ့ရဲတွေကို တလ ၂ ကြိမ်အနည်းဆုံးခေါ်ဆောင်ပြီး ၎င်းနေထိုင်ရာ ဦးပိုင်ရုံးအနီး တံတားကနေ လူငယ်တွေဆိုင်ကယ်မောင်းနှင်လာပါက PDF လို့စွပ်စွဲကာ ငွေညှစ်အနိုင်ကျင့်တာတွေ လုပ်ဆောင်နေသူဖြစ်တယ်လို့ သူကဆက်ပြောပါတယ်။

ဒေသခံသတင်းရင်းမြစ်တဦးကလည်း အသတ်ခံရသူဟာ အင်းငါးခွ သကြားစက်လက်ထောက်စက်ရုံမှူး ဗိုလ်ကြီးအငြိမ်းစားတဦးဖြစ်တယ်လို့ ဆိုပါတယ်။

" ဗိုလ်ကြီးဟောင်းဆိုတာ မှန်ပါတယ်။ ဗိုလ်ကြီးကို ပြည်မြို့နယ်အပိုင် ရှားပြင်ရွာနားမှာ ပစ်သတ်ခံရတာ ။ သူကရှားပြင်ရွာမှာ တာဝန်ကျတာ။ အဲ့ဒီမှာက ကြံခင်းတွေရော ထွန်စက်စခန်းတွေရောရှိတော့ သူက တာဝန်ယူရတာ။ ခုမနက်ပေါက်ခေါင်း အေးချမ်းရာသုဿန်မှာ သင်္ဂြိုဟ်ဖို့သယ်သွားပြီ”လို့ ပေါက်ခေါင်း မြို့ခံတဦးကပြောပါတယ်။

သြဂုတ် ၁၆ ရက်ကလည်း ပေါက်ခေါင်းမြို့နယ်၊ တာကောက်ကျေးရွာက အသက် ၅၀ နှစ်အရွယ် အုပ်ချုပ်ရေးမှူး ဇော်လင်းအောင် ဆိုသူ ခြင်းလုံးခတ်နေချိန် သေနတ်နဲ့  ၄ ချက်ပစ်ခံရပြီး သေဆုံးခဲ့တယ်လို့ သိရပါတယ်။

စာတည်း - ရင်ငြိမ်း

#မြေလတ်အသံ

#ပဲခူး #ပေါက်ခေါင်း #တပ်သတင်းပေး #စစ်မှုထမ်းဟောင်း #အရာရှိ #ပစ်သတ်ခံရ #PPDF #သတင်း